---

Ախալքալաքում խոսակցություններ են պտտվում այն մասին, որ փակվում է քաղաքում գործող ցանցային խանութներից երկուսը։ Չնայած խանութների ցանցային կենտրոններից Jnews-ին վստահեցրին, որ չեն փակվում, սակայն մենք եղանք տեղում և պարզեցինք, որ խանութներից մեկն իրոք փակվում է։

Ըստ խոսակցությունների՝ Ախալքալաքում փակվում են Spar և Magniti խանութները։ Spar-ը 3 տարուց ավել է ինչ գործում է, իսկ Magniti-ին բացվել է վերջերս։ Երկար տարիներ ցանցային խանութների ոչ մի մասնաճյուղ չէր գործում Ախալքալաքում, բացառությամբ «Jibe» մեծածախ ցանցի, որը բացվել է քաղաքի ծայրամասում։ Spar խանութը բացվել է երեք տարի առաջ, Libre-ն բացվել է 2023-ին, իսկ Ori Nabichi-ն և Magniti-ն բացվել են 2024-ին։

Մենք եղանք թե Magniti, թե  Spar խանութներում։  Magniti խանութն աշխատում էր բնականոն հունով, աշխատողները տեղյակ չէին փակվելու մասին։ Իսկ Spar խանութը կիսադատարկ էր, խանութի աշխատակիցները վստահեցրին, որ շուտով փակվելու են, դրա համար նոր ապրանք չեն ստանում։

Jnews-ը որոշեց հարցում անցկացնել բնակչության շրջանում պարզելու համար, թե մարդիկ որտեղից են հիմնականում առևտուր անում, և ինչքանով են ցանցային խանութները տարածված Ախալքալաքի բնակչության շրջանում։

Հարցում անցկացրել ենք՝ ինչպես Ախալքալաքի փողոցներում, այնպես էլ Jnews-ի պաշտոնական Instagram-յան էջում։

Jnews-ի հարցմանը Ախալքալաքի փողոցներում մասնակցել է 62 մարդ․

• նրանցից 23-ը (37․1%)՝ հիմնական առևտուր են անում մեծածախ խանութներից,
• իսկ 21-ը (33,87%)՝ հրաժարվեց պատասխանել,
• 7-ը (11,29%)՝  օգտվում են ցանկացած խանութներից,
• 5-ը (8,06%)՝ առևտուր են մեծածախ և ցանցային խանութներից,
• 3-ը (4․84%)՝ իրենց բնակության վայրին մոտ գտնվող խանութներից,
• իսկ 3-ը (4,84 %)՝  մանրածախ խանութներից։

Jnews-ի պաշտոնական Instagram-յան էջում հարցմանը մասնակցել է 293 մարդ․

• նրանցից 162-ը (55%)՝ առևտուր է անում մեծածախ խանութներից,
• 67-ը (23%)՝ ցանցային խանութներից,
• 41-ը (14%)՝ իրենց առևտուրը կատարում են բնակության վայրին մոտ գտնվող մանրածախ խանութներից,
• իսկ 23-ը (8%)՝ առևտուր են անում գյուղատնտեսական շուկայից:

Նոր բացված ցանցային խանութները, չնայած հաճախակի անցկացվող զեղչերի, միևնույն է, այդքան էլ մեծ տարածում չգտան Ախալքալաքում։ Այս մասին փաստում են վերոնշյալ տվյալները։

Ախալքալաքը բավականին մեծ շրջան է, որն իր մեջ ներառում է մի քանի տասնյակ գյուղ։ Այն համարվում է առևտրային կենտրոն ոչ միայն քաղաքի բնակիչների, այլ նաև շրջանի բոլոր գյուղերի համար։ Այստեղ կան մեծ, փոքր, մեծածախ, մանրածախ և ցանցային խանութներ։