Երեկ` հունվարի 17-ին, տեղի է ունեցել Արցախի՝ Բաքվում ապօրինի պահվող ռազմա-քաղաքական ղեկավարների գործով առաջին դատական նիստը։
Ադրբեջանական պետական ԶԼՄ-ների փոխանցմամբ՝ քրեական գործերով կա ավելի քան 531 հազար տուժող և նրանց ներկայացուցիչներ։
Ըստ ադրբեջանական ԶԼՄ-ների` Արցախի չորրոդ նախագահ Արայիկ Հարությունյանը ելույթ է ունեցել` նշելով, որ ափսոսում է 44-օրյա պատերազմի ժամանակ Գյանջայի հրթիռակոծությունների հետ կապված իր հայտարարության համար։
Դատական նիստը հետաձգվել է մինչև հունվարի 21-ը:
Հիշեցնենք, որ այս քրեական գործով մեղադրյալները 15-ն են` Արցախի Հանրապետության երկրորդ նախագահ Արկադի Ղուկասյանը, Արցախի չորրորդ նախագահ Արայիկ Հարությունյանը, Արցախի երրորդ նախագահ Բակո Սահակյանը, Արցախի ԱԺ վերջին նախագահ Դավիթ Իշխանյանը, Արցախի Հանրապետության նախագահի նախկին խորհրդական, նախկին արտգործնախարար Դավիթ Բաբայանը, Արցախի ՊԲ նախկին հրամանատար Լևոն Մնացականյանը, ՊԲ հրամանատարի նախկին տեղակալ Դավիթ Մանուկյանը և ևս 8 քաղաքացիական անձինք՝ Գարիկ Մարտիրոսյան, Մելիքսեթ Փաշայան, Դավիթ Ալավերդյան, Գուրգեն Ստեփանյան, Լևոն Բալայան, Մադաթ Բաբայան, Վասիլի Բեգլարյան, Էրիկ Ղազարյան։
Իսկ Արցախի նախկին պետնախարար Ռուբեն Վարդանյանի գործը քննվում է առանձին վարույթով: Երեկ տեղի է ունեցել նաև նրա գործով առաջին նիստը:
«Ռուբեն Վարդանյանը և նրա փաստաբանը ներկայացրել են երկու միջնորդություն»,- գրել է ադրբեջանական APA գործակալությունը:
Դրանցից մեկը վերաբերել է Ռուբեն Վարդանյանի դեմ հարուցված քրեական գործի միավորմանը մյուս 15 հայ գերիների գործին, մյուսը՝ գործի նյութերին ծանոթանալու համար լրացուցիչ ժամանակ տրամադրելուն։
Դատախազը առարկել է քրեական գործերը մեկ վարույթում միավորելու միջնորդության դեմ և դատարանին խնդրել է չբավարարել այն, սակայն կողմ է եղել գործի նյութերին ծանոթանալու համար լրացուցիչ ժամանակ տրամադրելու միջնորդությանը։
Դատարանը նշել է` քանի որ Ադրբեջանի քրեական դատավարության օրենսդրությունը չի նախատեսում քրեական գործերը դատաքննության ընթացքում միավորել մեկ վարույթում, չի բավարարի այդ միջնորդությունը:
Իսկ երկրորդ միջնորդությունը բավարարել է` Ռուբեն Վարդանյանին և նրա փաստաբանին տրամադրելով լրացուցիչ 10 օր՝ գործի նյութերին ծանոթանալու համար։
Ռուբեն Վարդանյանին առաջադրված է 42 մեղադրանք, որոնցից մի քանիսով նախատեսվում է մինչև ցմահ ազատազրկում: Երեկ Ռուբեն Վարդանյանը ընտանիքի հետ հեռախոսազանգի միջոցով ուղերձ էր փոխանցել, որում նշել էր, որ մինչև հիմա իրեն հնարավորություն չի տրվել ծանոթանալու պաշտոնական մեղադրական եզրակացությանը։ Ընդամենը թույլ են տվել թերթել 422 հատորանոց քրեական գործը ադրբեջաներենով, որին ինքը չի տիրապետում, և դրա համար հատկացվել է բավականին կարճ ժամանակահատված։
Նա նաև նշել էր, որ ճնշում է գործադրվել իր, իր փաստաբանի և թարգմանչի վրա, որպեսզի ստիպեն ստորագրել փաստաթղթեր հետին թվով, այդ թվում՝ չկայացած հարցաքննությունների կեղծ արձանագրություններ: Վարդանյանը պահանջում է բաց, հրապարակային դատաքննություն։
Նրա գործով նիստը հետաձգվել է մինչև հունվարի 27-ը:
Հիշեցնենք, որ Արցախի ռազմաքաղաքական ղեկավարները ապօրինի ազատազրկված են Բաքվում 2023 թվականի սեպտեմբերից։ Արցախի ամբողջական օկուպացիայից հետո Ադրբեջանի ուժայինները ձերբակալեցին և Բաքու տեղափոխեցին Արցախի նախկին և ներկա ռազմաքաղաքական ղեկավարության 8 ներկայացուցիչների։
Գլխավոր լուսանկարը` ադրբեջանական APA գործակալության
