Ջավախքում ավանդական և պաշտոնական խնամախոսությունները կամաց-կամաց փոխարինվում են ամուսնության առաջարկի ժամանակակից մեթոդներով։ Երիտասարդները նախընտրում են ամուսնության առաջարկի «Marry me» տարբերակը։
Տարիներով ձևավորված խնամախոսությունների ավանդական ձևաչափի ակտուալությունը երիտասարդների շրջանում տարեցտարի նվազում է։ Ներկայումս, երիտասարդների շրջանում մեծ տարածում ունի ամուսնության առաջարկի ժամանակակից տարբերակը՝ այսպես կոչված «Marry me»-ին (Ամուսնացիր ինձ հետ)։ Կարճ ժամանակահատվածում այն մեծ տարածում գտավ ամբողջ աշխարհում, և Ջավախքն էլ բացառություն չկազմեց։ Չնայած նրան, որ Ջավախքում ապրում են ավանդապաշտ մարդիկ, նորույթ հանդիսացող ամուսնության առաջարկի այս ձևը ևս ընդունվեց և սիրվեց ժողովրդի կողմից։
Այսօր երիտասարդները նախընտրում են ամուսնության առաջարկի վերոնշյալ տարբերակը։ Այն նորաոճ է, գեղեցիկ, համարյա միշտ ուղկեցվում է գեղեցիկ հրավառությամբ և քաղցրահամ տորթով։ Նման առաջարկություններ կազմակերպելու համար մարդիկ դիմում են հատուկ մասնագետների՝ ձևավորողների, ֆլորիստների։ Ախալքալաքում արդեն կան մարդիկ, ովքեր զբաղվում են նման արարողությունների կազմակերպմամբ։ Ֆլորա Բանդիկյանը, ով մասնագիտությամբ դիզայներ է, Ջավախքում զբաղվում է նման առիթների կազմակերպմամբ և ձևավորմամբ։
«Առաջին անգամ ամուսնության առաջարկություն կազմակերպել եմ Ախալքալաքում 2024 թվականի մարտի 8-ին։ Այդ առաջարկությունից հետո արդեն շատ էր պահանջարկը։ Այս երկու տարիների ընթացքում շատ պոպուլյար է դարձել։ Ճիշտ է, դեռ կենդանի երաժշտության ուղեկցությամբ չենք կազմակերպել, բայց հուսանք, դա ևս շուտով կլինի։ Առաջարկությունների ժամանակ հրավառությունը դարձել է պարտադիր պայման», – պատմում է Ֆլորան։
«Առաջին առաջարկությունը բոլորիս մեջ էր տպավորվել։ Փեսայի հետ կազմեկերպեցինք մի քանի օրում։ Փեսացուն այստեղ չէր, Ռուսաստանում էր, բայց միևնույն է, կազմակերպման ընթացքը շատ հետաքրքիր էր, իսկ հարսնացուն ընդհանրապես տեղյակ չէր», – հիշում է Ֆլորան։
Տարիների ընթացքում Ջավախքում ձևավորվեց ամուսնության առաջարկի տարբերակներ՝ ավանդական և պաշտոնական խնամախոսությունը, աղջիկ փախցնելը, ժամանակակից և արդեն տարածում գտած «Marry me»-ին։
