Այսօր 2025 թվականի չորրորդ օրն է, իսկ այս պահի դրությամբ Ջավախքում արդեն հաստատվել է դանակահարության երկու դեպք: Առաջին դեպքը տեղի է ունեցել հունվարի 1-ին Ախալքալաքի շրջանի Բավրա գյուղում, իսկ երկրորդը՝ հունվարի 2-ին, Նինոծմինդայի շրջանի Գանձա գյուղում:
Գանձա գյուղում դանակահարությունն ավարտվել է մահվան ելքով: Jnews-ի ունեցած տեղեկության համաձայն՝ մահացածը ծնվել է 2000 թվականին։ Վերջինս արնաքամ է եղել, վնասվել է գլխավոր երակը, որը դարձել է մահվան պատճառ: Ախալքալաքի հիվանդանոց տեղափոխելուց հետո անմիջապես ռեոմոբիլ են կանչել, սակայն տուժածի կյանքը փրկել չի հաջողվել:
Ներքին գործերի նախարարությունից Jnews-ին հայտնեցին, որ կասկածյալը ձերբակալվել է, գործ է բացվել Վրաստանի քրեական օրենսգրքի 117-րդ հոդվածով (առողջությանը կանխամտածված վնաս հասցնել), որը նախատեսում է պատիժ՝ ազատազրկում 4-7 տարի ժամկետով:
Ինչ վերաբերվում է Բավրա գյուղում տեղի ունեցած դանակահարությանը, ապա ձերբակալված է մեկ անչափահաս անձ, որպես խափանման միջոց ընտրվել է ազատազրկումը: Այս գործը ևս ՆԳՆ-ի փոխանցմամբ բացվել է Վրաստանի քրեական օրենսգրքի 117-րդ հոդվածով (առողջությանը կանխամտածված վնաս հասցնել), տուժածը հոսպիտալացվել է, մահվան դեպք չի գրանցվել:
