Դեկտեմբերի 26-ին, Ախալքալաքի մունիցիպալիտետի Խանդո գյուղում կայացավ մշակութային միջոցառում, որը կազմակերպել էր «Խաչկավանք» պարային խմբի հիմնադիր և պարուսույց Մանվել Սահարյանը։
Միջոցառմանը մասնակցում էին Խանդո, Վարևան և Կոկիո գյուղերի պարային համույթների սաները։
«Մենք աշխատում ենք 2017 թվականից։ Տարիքային խմբերից մասնակցում են 3-ից մինչև 18 տարեկան երեխաները։ Չունենք հովանավոր և պետական աջակցություն, բոլոր ծախսերը հոգում են ծնողները։ Ազգային տարազի հարցում ունենք որոշակի խնդիրներ, բայց ծնողների աջակցությամբ աստիճանաբար լրացնում ենք այդ բացը», — ասաց Մանվել Սահարյանը։
Երկրորդ մասնագիտությամբ լինելով ռեժիսոր վերջինս ձևավորել է նաև թատերական խումբ։
«Խաչկավանք» պարային խմբի հիմնադիր, պարուսույց Մանվել Սահարյանը Jnews-ի հետ զրույցում ասաց, որ պայմանները գոհացուցիչ չեն, սակայն դա իրենց չի խանգարում։
«Լավագույն պայմաններում կարող են աշխատել բոլորը, վատ պայմաններում նման միջոցառում ացկացնելը ոչ բոլորին է հաջողվում։ Համույթի անվանումը պատահական չէ ընտրված։ Մեր նախնիները գաղթել են հենց Էրզրումի Խաչկավանք գյուղից», — նշեց պարուսույցը։
Հանդիսատեսը հիացած էր միջոցառումից և իր շնորհակալությունն էր հայտնում պարուսույցին։
Խանդո գյուղի բնակիչ Միսակ Հակոբյանը ասաց․ «Պարն ու երգն արտացոլում է ազգի ըմբոստության ինքնատիպությունը, պահում ու տարածում է ազգի հոգևոր արժեքները»։
Պարային անսամբլը հանդես եկավ վրացական և հայկական երգ ու պարով։ Դահլիճը լեփ-լեցուն էր, համերգին ներկա էին, երեխաների ծնողններ ու հարազատնները, համագյուղացինները, ինչպես նաև հարևան գյուղերից եկած արվեստասերները։
Տարեվերջյան ամփոփիչ միջոցառման ավարտին բոլոր մասնակիցները ստացան շնորհակալագրեր ու մեդալներ։
