Նախատոնական օրերին Ախալքալաքում հասարակությանն անհանգստացնող թեման թերևս արհեստական թանկացումներն են: Այս տարի նախատոնական շրջանում կարծես մսամթերքը չի թանկացել։ Մսավաճառները պնդում են՝ գրեթե նույն գինն է միսը, ինչ մեկ ամիս առաջ էր։
Jnews-ը փոքրիկ հարցախույզ է անցկացրել մսավաճառների շրջանում պարզելու, արդյոք միսը թանկացել է և ինչքան։
Հարցմանը մասնակցած մսավաճառների մեծամասնության պատասխաններից կարելի է եզրակացնել, որ նախատոնական արհեստական թանկացումներ այս տարի դեռ չկան։
Դեկտեմբերի 25-ի տվյալներով՝
Տոն օրերին, երբ մսի սպառումը սովորականից ավելի է, մսամթերքի, պահանջարկն աճում է, առաջարկը՝ նույնպես:
Գյուղացին անասունը մորթում է և բերում քաղաք՝ վաճառելու, բայց իր ապրանքը վաճառելու տեղ չունի, ուստի փողոցներում ժամանակավոր վաճառասեղաններ են հայտնվում։
«Եթե շուկա լինի, ապա բնակիչները կարող են վաճառել՝ միս, ձուկ, կաթնամթերք և այլ ապրանքներ։ Շուկա չկա, դրա համար շատ դժվար է պայքարել փողոցային առևտրի դեմ», – ասաց մսավաճառներից մեկը, ով խուսափեց նշել անուն ազգանունը։
Սուլդա գյուղից Արարատ Խաչատրյանի խոսքով, գյուղացին թե նախատոնական, թե սովորական օրերին դժվարությամբ և ցածր գնով է կարողանում իրացնել իր ապրանքը։
«Միսը տեղում վաճառում ենք շատ ցածր գնով, վրացի կամ Մառնեուլիի առևտրականները նույնպես ցածր գին են տալիս: Շուկայում 1 կգ միսն արժե 19 -25 լարի, իսկ առևտրականները մեզանից 15-16 լարիով են գնում», – ասում է Արարատ Խաչատրյանը:
