Azerbaijan Airlines ավիաընկերության Embraer 190 տեսակի մարդատար ինքնաթիռը, որը գործում էր AHY8243 կոդի ներքո, կործանվել է Ղազախստանի արևմուտքում գտնվող Ակտաու քաղաքի մոտ։ Այդ մասին հայտնում են ղազախական և ադրբեջանական լրատվամիջոցները։
Նախնական տվյալներով՝ Azerbaijan Airlines ավիաընկերության ինքնաթիռը Բաքվից մեկնում էր Գրոզնի։ Ադրբեջանական APA գործակալությունը փոխանցում է, որ կործանված ինքնաթիռում եղել է 67 ուղևոր և անձնակազմի 5 անդամ։ Նրանց մեծ մասը եղել են Ադրբեջանի քաղաքացիներ։
APA-ն նշում է, որ ինքնաթիռը Կասպից ծովի վրա աղետի ազդանշան է տվել և հարկադիր վայրէջքի համար ուղևորվել Ղազախստան: «Sputnik Азербайджан»-ը, հղում անելով ավիաընկերությանը, գրում է, որ վթարի պատճառ է դարձել թռչունների երամի հետ ինքնաթիռի բախումը։
Նախնական տվյալներով՝ Ակտաուի օդանավակայանում ինքնաթիռն ընկել է թռիչքուղուն հարակից դաշտում։
Ղազախստանի ներքին գործերի նախարարությունը հաստատել է ինքնաթիռի կործանումը։ Ընկնելու վայրում հրդեհ է առաջացել։ Նախնական տվյալներով՝ կան փրկվածներ։ Ղազախստանի առողջապահության նախարարությունը հայտնել է, որ 6 մարդ ողջ է մնացել։
