Ամանորյա տոներին զուգահեռ աճում է ծառերի, հատկապես եղևնիների հատման դեպքերը։ Ախալքալաքի շրջանը հարուստ է ծառատեսակներով, որոնց պահպանումը ձմռանը և նախատոնական շրջանում դառնում է բավականին դժվար։
Վրաստանի կառավարության №221 որոշման «Անտառօգտագործման կանոնների մասին» կանոնակարգում կարդում ենք․
Հոդված 4․
1․ Անտառի ընդհանուր օգտագործումը ներառում է ցանկացած անձի իրավունքը՝ լինել և ազատ տեղաշարժվել անտառում հանգստի և ժամանցի նպատակով: Այս իրավունքը չի ներառում այն անտառային ռեսուրսների օգտագործումը, որոնց օգտագործման համար Վրաստանի օրենսդրության համաձայն՝ պարտադիր է ստանալ համապատասխան իրավունք։
Ըստ ՍԱՔՍՏԱՏԻ տվյալների, Վրաստանում 2010-2023 թթ․ անօրինական անտառահատման դեպքերը առավելագույնի են հասել 2014 թվականին՝ 45 915 դեպք (Սամցխե-Ջավախեթիում՝ 1 583)։ Իսկ 2023 թվականին գրանցվել է 4 915 դեպք։
Անտառների և ծառերի անօրեն հատելը պատժելի է, և գործում են տուգանքներ։
Շրջակա միջավայրի պահպանության և գյուղատնտեսության նախարարության բնապահպանական վերահսկողության վարչությունը խստացնում է հսկողությունը՝ փշատերև ծառերի և բույսերի անօրինական կերպով հատելու, տեղափոխելու և արդյունահանման դեպքերից խուսափելու համար։ Վրաստանի ողջ տարածքում իրականացվում է 24-ժամյա հսկողություն, և առանձնահատուկ ուշադրություն են դարձնում փշատերև անտառներին։
«Փշատերևների ապօրինի ձեռքբերման, տեղափոխման և վաճառքի տուգանքն առաջին անգամ կազմում է մինչև 2000 լարի, կրկնվելու դեպքում՝ 5000 լարի՝ գումարած շրջակա միջավայրին հասցված վնասի չափը։ Եթե վնասի չափը գերազանցի 1000 լարին, ապա անձը կենթարկվի քրեական պատասխանատվության», – կարդում ենք է շրջակա միջավայրի պահպանման վերահսկողության բաժնի կայքի պաշտոնական էջում։
