Վրաստանի Ազգային վիճակագրական ծառայությունը («Սաքստատ») երկարացրել է բնակչության ընդհանուր մարդահամարի վերջնաժամկետը մինչև դեկտեմբերի 31-ը։
«Այսօր գործընթացն ակտիվորեն շարունակվում է։ Այն ավարտելու համար կպահանջվի ևս մի քանի օր, ուստի «Սաքստատ»-ը որոշել է երկարաձգել մարդահամարը ևս մի քանի օրով, և, համապատասխանաբար, գործընթացը կշարունակվի մինչև այս ամսվա վերջ»,- ասել է «Սաքստատ»-ի գործադիր տնօրեն Գոգիտա Թոդրաձեն։
Այսօրվա դրությամբ մարդահամարը հարցում է անցկացրել ավելի քան 3 միլիոն քաղաքացիների շրջանում:
Ըստ Թոդրաձեի, գործընթացը բարդանում է նրանով, որ շատ քաղաքացիներ, հատկապես Թբիլիսիում, դռները չեն բացում իրենց ներկայացուցիչների առաջ։ Նա խոստովանել է, որ դա կարող է պայմանավորված լինել երկրում տիրող իրավիճակով։ Բողոքի ակցիայի մասնակիցները Facebook-ում գրում են, որ անհայտ անձինք գալիս են իրենց տուն և փորձում են անձնական տվյալներ հավաքել՝ առանց որևէ փաստաթուղթ ներկայացնելու։
Տվյալների հավաքագրմանը վերջին օրերին խոչընդոտել է նաև որոշ շրջաններում եղանակային վատ պայմանները:
Հաշվի առնելով դա՝ այսօրվանից իր աշխատանքը վերսկսել է նաև ընդհանուր մարդահամարի ինքնագրանցման պորտալը։ Դրա վրա քաղաքացիները կարող են հարցաթերթիկներ լրացնել էլեկտրոնային եղանակով, առանց սոցհարցողների մասնակցության։
Վրաստանում մարդահամարը սկսվել է նոյեմբերի 14-ին։ Առաջին փուլում՝ մինչև նոյեմբերի 28-ը, այն իրականացվում էր միայն ինքնագրանցմամբ։ Երկրորդ փուլում «Սաքստատ»-ի աշխատակիցները սկսեցին տնետուն այցելությունները։
Մարդահամարին զուգահեռ կանցկացվի նաև գյուղատնտեսական հաշվառում։ Տնային տնտեսություններին կհարցնեն իրենց պատկանող գյուղատնտեսական նշանակության հողերի տարածքի և նպատակի, աճեցվող խաղողի տեսակների, խոշոր եղջերավոր անասունների քանակի, թռչնաքանակի մասին և այլն:
Մարդահամարի արդյունքում արդի տեղեկատվություն կստացվի բնակչության թվաքանակի, նրա տարիքային և սեռային կառուցվածքի, զբաղվածության, աշխատավարձի, կրթության, առողջական վիճակի և բնակարանային ապահովվածության վերաբերյալ:
Մարդահամարի նախնական արդյունքները կհրապարակվեն 2025 թվականի հունիսին, վերջնական արդյունքները՝ 2026 թվականի հունիսին։
Վրաստանում 10 տարին մեկ անցկացվում է բնակչության համընդհանուր մարդահամար։ Վերջին անգամ այն անցկացվել է 2014թ.-ին: Այդ ժամանակ ստացված տվյալների համաձայն՝ հանրապետությունում բնակվում էր 3 713 804 մարդ։
