«Եվրամիության ինստիտուտների նոր ղեկավարների նախաձեռնությունն է՝ դադարեցնել խոսակցությունները և անցնել գործողությունների»,- ասել է Վրաստանում ԵՄ դեսպան Պավել Հերչինսկին։ Դիվանագետը հիշեցնում է, որ դեկտեմբերի 16-ին ԵՄ արտաքին հարաբերությունների խորհուրդը կքննարկի երկրում ընթացող գործընթացները:
«Հաջորդ շաբաթ Բրյուսելում շատ կարևոր միջոցառումներ են տեղի ունենալու։ Երկուշաբթի օրը տեղի կունենա արտաքին հարաբերությունների խորհուրդը, նախարարները կքննարկեն Վրաստանի հարցը։ Շաբաթվա վերջին Եվրախորհրդի նիստում Վրաստանի հարցը կքննարկվի նաև եվրոպացի առաջնորդների կողմից։ Սա նշանակում է, որ մենք ԵՄ-ում շատ մտահոգված ենք Վրաստանի իրադարձություններով։ ԵՄ կառույցների նոր ղեկավարության պայմաններում կա ամուր հանձնառություն՝ դադարեել խոսել ու սկսել գործել»։
Դեսպանը բացատրում է, որ Բրյուսելում, ինչպես նաև ԵՄ տարբեր երկրներում բանակցություններ են ընթանում՝ Վրաստանի հետ կապված տարբեր միջոցների շուրջ համաձայնեցնելու համար։
«Հուսով եմ, որ 27 անդամ երկրները կարող են պայմանավորվել կոնկրետ միջոցների շուրջ։ Բոլոր տարբերակները սեղանին են: Սպասենք մինչև երկուշաբթի, կդիտարկվեն բոլոր տարբերակները, այդ թվում՝ կոնկրետ անձնագրեր ունեցողների համար առանց վիզայի ռեժիմի կասեցումը և ամենակարևորը՝ պատժամիջոցները։ Մենք միշտ ասել և ասում ենք, որ չենք ցանկանում վրաց ժողովրդին վնասել և պատժել։ Որովհետև այդ մարդիկ ամեն երեկո դուրս են գալիս փողոց ու ծածանում Վրաստանի ու Եվրամիության դրոշները։ Մեր նպատակը նրանց պատժելը չէ, մեր նպատակն է հզոր ազդակ հաղորդել իշխանություններին, որ անընդունելի է այն ճանապարհը, որը նրանք ընտրել են վերջին ամիսներին և հատկապես վերջին օրերին ցուցարարների նկատմամբ դաժան վերաբերմունքին»։
Պավել Հերչինսկին ևս մեկ անգամ դատապարտել է բողոքի ցույցերի բռնի ցրումը և իրավապահների կողմից ցուցարարներին բերման ենթարկելիս չափից ավելի ուժի կիրառումը։
«Ես հանդիպել եմ Վրաստանում իրավապաշտպանների հետ, և նրանք ինձ ասացին, որ ձերբակալությունից հետո ցուցարարներին ծեծում են, իսկ դա նշանակում է խոշտանգում։ Սա պետք է դադարեցվի, դա միանգամայն անընդունելի է։ Նրանք պետք է հետաքննեն նաև Թբիլիսիի փողոցներում տեղի ունեցած միջադեպը, երբ հանցավոր խմբավորումները շրջում էին քաղաքում, և նման հարձակումների բոլոր մեղավորները պետք է պատասխանատվության ենթարկվեն, իսկ անարդարացիորեն ձերբակալված մարդիկ պետք է հնարավորինս արագ ազատ արձակվեն»։
Թբիլիսիում և այլ քաղաքներում արդեն տասնհինգերորդ օրն է ցույցեր են ընթանում։ Քաղաքացիները դեմ են «Վրացական երազանքի» որոշմանը, ըստ որի՝ կառավարությունն այլևս չի լինի Եվրամիության հետ բանակցություններ սկսելու շուրջ եկրխոսության նախաձեռնողը մինչև 2028 թվականը։
Այս որոշման հրապարակումից ի վեր՝ նոյեմբերի 28-ից դեկտեմբերի 11-ը, ՆԳՆ աշխատակիցները ձերբակալել են Թբիլիսիում և այլ քաղաքներում եվրոպամետ ցույցերի ավելի քան 400 մասնակիցների, իսկ քրեական մեղադրանքներով՝ ավելի քան 30 ցուցարարների։ Նրանց որոշ դեպքերում սպառնում է մինչև 7 տարվա ազատազրկում։
