«Օվալի» ՍՊԸ-ն Ախալքալաքի նախկին թիվ 1 զինվորական ավանում նոր կոյուղագիծ է կառուցում։ Այժմ եղանակային պայմանների պատճառով աշխատանքները դադարեցվել են, սակայն փորված հողը և խաղահրապարակի մոտ գտնվող բաց դիտահորերը վտանգ են ներկայացնում երեխաների համար, իսկ ավանի բնակիչներին՝ անհարմարություններ պատճառում։
Նոր կոյուղագծի կառուցման մրցույթը շահել է «Օվալի» ՍՊԸ-ն 193 675 լարիի չափով։ Պայմանագիրը ստորագրվել է նոյեմբերի 4-ին։ Մրցութային փաստաթղթերի համաձայն, ընկերությունը պայմանագիրը կնքելուց հետո (մինչև եղանակի վատթարացումը) պետք է 2024 թվականին 70 օրվա ընթացքում աշխատանքները կատարի, իսկ եղանակի բարելավումից հետո՝ 2025 թվականին 50 օրվա ընթացքում։
Նախկին թիվ 1 զինվորական ավանում նոր կոյուղագծի կառուցման աշխատանքները սկսվել են նոյեմբերին՝ ավելի քան երկու շաբաթ առաջ, առատ ձյունից հետո աշխատանքները դադարեցվել են։ Աշխատանքի վայրում բանվորները թողել են շինանյութ, խողովակներ, կոյուղագծի խողովակներով բաց դիտահորեր, որոնք ծածկված են ձյունով և գրեթե անտեսանելի են։ Նաև մեծ կոյուղու խողովակներով փորված հողը փակել է խաղահրապարակի մուտքը բնակելի շենքի կողմից։ Այս տարածքում, բազմահարկ բնակելի շենքի դիմաց, բնակիչների և երեխաների տեղաշարժը դեպի խաղահրապարակ դժվար է, իսկ բաց դիտահորերը վտանգ են ներկայացնում բոլորի, այդ թվում՝ մեքենաների համար։
2-3 շաբաթվա աշխատանքի ընթացքում ընկերությունը ջրանցքներ է փորել, մի քանի կոյուղու դիտանցքեր տեղադրել և խողովակների մի մասը։
«Օվալի» ՍՊԸ-ի տնօրեն Դիմա Արչվաձեն ասում է, որ իրենք պատրաստ են շտկել, եթե ինչ-որ բան անհարմարություն է պատճառում։
«Ինչ կարելի էր անել, մենք արել ենք, կշարունակենք, երբ քաղաքապետարանից գրություն ստանանք։ Կպարզենք, և եթե խնդիր լինի, մենք կլուծենք, ես կպարզեմ ու կանենք այնպես, որ ոչ մեկին չխանգարի»,- ասել է Դիմա Արչվաձեն։
Այս տարածքում գործող կոյուղագիծն արդեն հնացել էր, խողովակները փտել էին, գիծը հաճախ խցանվում էր, ուստի Ախալքալաքի մունիցիպալիտետի քաղաքապետարանը որոշել է նոր կոյուղագիծ կառուցել։
«Օվալի» ընկերության տնօրենի խոսքով, իրենք փոս են փորել, սակայն հետո պարզվել է, որ այս վայրում ստորգետնյա մալուխ է անցնում։ Ընկերությունը ստիպված է եղել փոխել ուղղությունը։ Սա նախագծով նախատեսված չի եղել:
«Մենք սկսել ենք մի ուղղությամբ, բախվել ենք մալուխի, ոչ ոք չգիտեր դրա մասին, մենք փոխել ենք ուղղությունը: Սրա համար քաղաքապետարանը պետք է պաշտոնապես թույլտվություն տա»,-հավելեց Դիմա Արչվաձեն։
