Դեկտեմբերի 8-ին, Ախալքալաքում տեղի ունեցավ համերաշխության ակցիա՝ ի աջակցություն ցույցերի ժամանակ տուժած լրագրողների և ակտիվիստների։
Դեկտեմբերի 8-ի առավոտյան Jnews-ի լրագրողները հայտարարել էին ի աջակցություն տուժած լրագրողների համերաշխության ակցիա։ Ակցիայի ընթացքում նրանց միացել են 2 մասնակից՝ հասարակական սեկտորի ներկայացուցիչ և քաղաքացիական ակտիվիստ։
Ակցիան անցկացվել է «Լրագրողները թիրախ չեն: Խոսքի ազատություն առանց բռնության և ագրեսիայի» կարգախոսով։ Ցուցարարները նաև պաստառներ են պահել իրենց ձեռքերում՝ «Համերաշխություն վիրավորված լրագրողներին», «Ո՛չ բռնությանը, ատելությանը, տեռորին», «Ազատ խոսքը, չպետք է արյունոտ լինի», «Ես լրագրող եմ և ուզում եմ աշխատել անվտանգ պայմաններում» գրություններով։ Պաստառները հայերեն, վրացերեն և ռուսերեն լեզուներով էին։
Թբիլիսիում քաղաքացիական բողոքի ակցիաները լուսաբանող լրագրողների նկատմամբ անմարդկային, դաժան վերաբերմունքը լրագրողներին և պարզապես ակտիվ բնակիչներին դրդեց դուրս գալ բողոքի ակցիայի։ Ախալքալաքից ցուցարարները իշխանություններից պահանջում են անվտանգ պայմաններ իրենց մասնագիտական պարտքի կատարման համար, անվտանգություն բոլոր քաղաքացիների համար։
Բողոքի 10 օրվա ընթացքում տուժել են 50 լրագրողներ և լրատվամիջոցների աշխատակիցներ։
Jnews-ը համերաշխություն է հայտնում «TV Pirveli»-ի նկարահանող խմբին և բռնությունից տուժած բոլոր գործընկերներին։
