Այսօր՝ դեկտեմբերի 7-ին, Ախալքալաքի Սուրբ Խաչ եկեղեցում պատարագ է մատուցվել՝ ի հիշատակ 1988 թվականի Սպիտակի երկրաշարժի զոհերի։ Սուրբ Խաչ եկեղեցու բակում մարդիկ ծաղիկներ են խոնարհել Մեծ Եղեռնի զոհերի հուշարձանին։ Եկեղեցում հիշատակման մոմեր են վառվել։
Առավոտից Ախալքալաքի Սուրբ Խաչ եկեղեցի են եկել տարբեր պետական կառույցների աշխատակիցներ, տեղական ինքնակառավարման մարմինների ներկայացուցիչներ։ Նրանք ծաղիկներ են դրել և մոմեր վառել։ Սպիտակի երկրաշարժի զոհերի հիշատակը հարգելու են եկել նաեւ Ախալքալաքի Հայկական երիտասարդական կենտրոնի սաները։
1988 թվականի դեկտեմբերի 7–ին՝ ժամը 11:41-ին, Հայաստանը մոտ 35-45 վայրկյան ցնցվեց, էպիկենտրոնում երկրաշարժի ուժգնությունը Ռիխտերի սանդղակով 10 բալ էր: Երկրաշարժի հետևանքով ավերվածություններ եղան երկրի 21 քաղաքում և 324 գյուղում:
Ամբողջովին ավերվեցին Սպիտակ քաղաքն ու հարակից գյուղերը, քանդվեց Հայաստանի երկրորդ քաղաքի Գյումրիի (Լենինական) շինությունների 80%-ը, մեծ վնասներ կրեց Վանաձորը: Երկրաշարժն աղետալի եղավ երկրի տարածքի 40%-ում Շիրակի, Լոռու, Արագածոտնի ու Տավուշի մարզերում:
Պաշտոնական տվյալներով՝ երկրաշարժը 25,000 մարդու կյանք է խլել, 100,000-ը ստացել է մարմնական տարբեր աստիճանի վնասվածքներ, 19,000-ը դարձել հաշմանդամ, մոտ 530,000 քաղաքացի անօթևան: Աղետի գոտուց 120,000 մարդ տարհանվել է, որոնցից 75,000–ը՝ Հայաստանից դուրս:
36 տարի անց էլ երկրաշարժի հետեւանքները դեռ ամբողջովին վերացված չեն, դեռ կան ժամանակավոր տնակներում բնակվող ընտանիքներ:
1988 թ. դեկտեմբերի 9-ին` ժամը 22:00-ին, Թբիլիսի քաղաքից ժամանեց քաղաքացիական պաշտպանության զորամասի առաջին գումարտակը: 1988 թ.-ի դեկտեմբերի 10-ի ժամը 10-ին Թբիլիսիից ժամանեցին նաև մեքենայացված գումարտակների մնացած մասը: Նրանք նույնպես ուղարկվել էին փրկարարական գործողություններին մասնակցելու նպատակով:
Միջազգային օգնությունը հասավ դեկտեմբերի 12-ին: 111 երկիր, ներառյալ ԱՄՆ-ը, Բելգիան, Մեծ Բրիտանիան, Իտալիան, Նորվեգիան, Ֆրանսիան, ԳԴՀ-ն և Շվեյցարիան, օգնեցին ԽՍՀՄ-ին` տրամադրելով փրկարարական սարքավորումներ, մասնագետների, սնունդ և դեղորայք: Օգնություն է ցուցաբերվել նաև վերականգնման աշխատանքներում:
Ձմռանը երկրաշարժից տուժածներին օգնելու և ավերված տները վերակառուցելու համար մեծաքանակ հանգանակություններ են ուղարկվել ամբողջ աշխարհից:
Երկրաշարժի արդյունքում ավերվել կամ վթարային են դարձել 210 հազար աշակերտների համար նախատեսված միջնակարգ դպրոցներ, 42 հազար հոգու համար նախատեսված մանկապարտեզներ, 416 առողջապահական հաստատություններ, երկու թատրոն, 14 թանգարան, 391 գրադարան, 42 կինոթատրոն, 349 ակումբ և մշակույթի տներ: Շարքից դուրս է եկել 600 կիլոմետր ավտոճանապարհ, 10 կիլոմետր երկաթուղի, ամբողջությամբ կամ մասամբ ավերվել են 230 արդյունաբերական ձեռնարկություններ:
