Ախալքալաքի հասարակական կազմակերպությունները մտահոգված են Թբիլիսիում տեղի ունեցող բողոքի ակցիաներին տիրող բռնությամբ, ինչպես նաև «Վրացական երազանքի»՝ երկրի եվրաինտեգրման գործընթացը կասեցնելու որոշումից՝ դա համարելով սուր հարված երկրի էթնիկ փոքրամասնությունների, մասնավորապես Ջավախքի հայերի, ինտեգրման խնդրին։ Այս մասին ասվում է կազմակերպությունների տարածած հայտարարությունում։
Հայտարարության մեջ մասնավորապես ասվում է.
«Մենք՝ Ախալքալաքի հասարակական կազմակերպություններս, մեր մտահոգությունն ենք հայտնում Վրաստանում ստեղծված իրավիճակի հետ կապված։
Նախևառաջ՝ անթույլատրելի ենք համարում այն, ինչ տեղի է ունենում Թբիլիսիում վերջին 7 օրվա ընթացքում, բողոքի ցույցերի ժամանակ։ Բռնությունն ու ատելությունը, որը թափ է առնում ակցիաների ժամանակ, չպետք է լինի մեկ ազգի, մեկ երկրի մարդկանց միջև, մարդկանց, ովքեր այսօր կառուցում են ապագա Վրաստանի համար, ապագա իրենց երեխաների համար։
Կոչ ենք անում կողմերին հարգել Վրաստանի քաղաքացիների խաղաղ ցույցերի իրավունքը և զերծ մնալ բռնություններից, սադրանքներից ու ոչ համաչափ ուժի կիրառումից։
Բացի այդ, մենք մտահոցված ենք «Վրացական երազանքի» որոշումով, ըստ որի կասեցվելու է երկրի եվրաինտեգրման գործընթացը, որը երկրի բնակչության և իշխանությունների սահմանադրորեն հաստատված ձգտումն է երկրի անկախության ողջ պատմության ընթացքում։
Չնայած այն հանգամանքին, որ մենք վտանգ ենք տեսնում ամբողջ երկրի զարգացման համար, այնուամենայնիվ, ցանկանում ենք մեր մտահոգությունը արտահայտել երկրի հասարակական-քաղաքական կյանքին էթնիկ փոքրամասնությունների ինտեգրման գործընթացին սպառնացող վտանգի վերաբերյալ։ Վրաստանի էթնիկ փոքրամասնությունների ինտեգրման գործընթացը, որը սկսվել է մոտ 30 տարի առաջ և նոր է թափ առնում, ուղղակի վտանգի տակ է, քանի որ ինտեգրացիոն գործընթացն ընթանում է երկրի ժողովրդավարական զարգացման շրջանակներում, որը ընթացել է Եվրոպական ինտեգրացիոն գործընթացների շրջանակներում:
Սամցխե-Ջավախքի էթնիկ փոքրամասնությունները միշտ տարանջատված են եղել երկրի ընդհանուր հասարակական-քաղաքական կյանքից, իսկ եվրոպական ինտեգրումից ու երկրի ժողովրդավարական զարգացման դրամաշնորհներից և ֆինանսավորումից հրաժարվելը հետ կմղի էթնիկ փոքրամասնությունների ինտեգրման հարցում այն փոքրիկ առաջընթացը, ինչը դժվարությամբ է ձեռք բերվել երկու տասնամյակի ընթացքում և կփակի հետագա ինտեգրման հեռանկարը»։
Հայտարարությունը ստորագրել են հետևյալ կազմակերպությունները.
• Քաղաքացիական զարգացման ասոցիացիա «Ապագայի կորպուս»
• Տեղական զարգացման խումբ՝ LAG Ախալքալաք
• Սամցխե-Ջավախքի կանայք հանուն խաղաղ Վրաստանի
• Առաջ դեպի նոր հնարավորություններ
• Բաց սահմաններ
• Ջավախքի լրատվական կենտրոն (մեդիա)
• Ախալքալաքի բիզնես կենտրոն
• Մեծահասակների կրթության կենտրոն
