Ախալքալաքի մունիցիպալիտետի 2025 թվականի բյուջեի նախագծով 26 000 լարի է հատկացվել անօթևան շներին բռնելու, ստերջացնելու, ամորձատելու, պատվաստելու, նույնականացնելու և վերադարձնելու, իսկ անհրաժեշտության դեպքում՝ էֆթանազիայի ենթարկելու համար։ Այսինքն՝ խնդրի լուծման թե՛ գումարը, թե՛ մեթոդը մնում են նույնը, ինչը շոշափելի արդյունքներ մինչ այս չի տվել։
Անօթևան շների խնդիրը լուծելու համար տեղական իշխանությունների մակարդակով բազմիցս քննարկվել է կացարան կառուցելու հարցը։ Սամցխե-Ջավախեթիի նահանգապետարանից խոստացել են կացարան կառուցել, բայց այս տարի, ինչպես վերջին մի քանի տարիներին, Ախալքալաքի մունիցիպալիտետի բյուջեից հաջորդ տարվա համար հատկացվում է 26000 լարի։ Այս գումարը, սակայն, բավարար չէ խնդրին լուծում տալու համար, և առհասարակ, այդ խնդրի լուծման մեթոդներն անարդյունավետ են։ Օրինակ, այս տարի ստերջացման գործընթացը սկսվել է սեպտեմբերին, ինչը նշանակում է, որ մինչ այդ շները մի քանի անգամ սերունդ են տվել։
«Սա գլոբալ, մեծ խնդիր է, կա մասնագետների խնդիր: Սա կապված է մեծ ծախսերի հետ։ Ուստի նրանք չեն կարողանում համաձայնության գալ։ Այս խնդիրը միայն մեր մունիցիպալիտետում չէ, և մեր մունիցիպալիտետը չի կարող ինքնուրույն լուծել այդ հարցը»,- ասում է Ախալքալաքի մունիցիպալիտետի քաղաքապետարանի աշխատակազմի տնտեսական զարգացման և ունեցվածքի ծառայության պետ Մնացական Փամբուխչյանը։
Անօթևան շների համար բուծարան կկառուցվի
«Պետք է այնպես անենք, որ շների բազմացումը նվազի: 26000-ը նշանակություն չի ունենա, թվաքանակը չի պակասում: Մենք ուղղակի բյուջեում հոդված ենք գրում, դա գրեթե նույն էֆեկտն է, եթե մենք չհատկացնենք ֆինանսներ: Յուրաքանչյուր շան համար ծախսվո՞ւմ է 180 լարի: Եթե զբոսայգու մոտ հավաքենք թափառող շներին, այդքան (142 շուն) կստացվի՞, իսկ մնացա՞ծը»,- մեկնաբանեց Սակրեբուլոյի նախագահ Նաիրի Իրիցյանը։
Թափառող շների հարցը ամբողջ Վրաստանում լուրջ և անլուծելի խնդիրներից է։ Թափառող շներին բռնելու, ստերջացնելու, ամորձատելու, պատվաստելու, նույնականացնելու և վերադարձնելու, իսկ անհրաժեշտության դեպքում՝ էֆթանազիայի ենթարկելու միակ միջոցն այս տարի ձգձգվել էր մինչև սեպտեմբեր։ Մինչեւ այս տարվա դեկտեմբեր պետք է բռնվեր 142 շուն։
Մինչ օրս ոչ մի անօթևան շուն չի բռնվել