Նոյեմբերի 29-ի առավոտյան ժամը 07:00-ին, հատուկ ջոկատայինները Թբիլիսիում, Ռուսթավելի պողոտայում բերման են ենթարկել հակառուսական ցույցի մասնակիցներին և ի վերջո ցրել ցույցը։ Քաղաքացիները բողոքում են իշխող «Վրացական երազանք» կուսակցության՝ Եվրամիությանն անդամակցության գործընթացը կասեցնելու որոշման դեմ։ Հատուկ ջոկատայինները բիրտ ուժ են կիրառել ցուցարարների նկատմամբ, այդ թվում՝ իրավապաշտպան Նիկա Ռոմանաձեի։ Տեղեկությունը փոխանցում է netgazeti.ge-ն։
Բողոքի ցույցը ցրելու համար ոստիկանությունը կիրառել է ջրցան մեքենաներ, արցունքաբեր գազ և պղպեղի սփրեյ, վիրավորվել են քաղաքացիներ, այդ թվում՝ լրագրողներ։ Ներքին գործերի նախարարությունը հայտնել է նաև 32 վիրավոր ոստիկանների մասին։
Վրաստանի ներքին գործերի նախարարությունը հայտնել է, որ Թբիլիսիի Ռուսթավելի պողոտայում բողոքի ակցիայի ժամանակ 43 մարդ է ձերբակալվել։
Բոլորը մեղադրվում են ոստիկանության պահանջներին չենթարկվելու և մանր խուլիգանության մեջ՝ Վարչական իրավախախտումների վերաբերյալ օրենսգրքի 166 և 123 հոդվածներով։
Լուսանկարը՝ արխիվից