Jnews-ը զրուցել է Վրաստանի ՄԻՊ Լևան Իոսելիանիի հետ խորհրդարանի լեգիտիմության գնահատականի հետ իր աշխատակազմի անհամաձայնության, ինչպես նաև նախընտրական շրջանում ատելության խոսքի և հայատյացության մասին։
Լևան Իոսելիանին նոյեմբերի 25-ին մասնակցել է խորհրդարանի առաջին նիստին, որին մասնակցել են միայն իշխող կուսակցության պատգամավորները։ Վրաստանի հանրային պաշտպանի գրասենյակի մոտ 40 աշխատակիցներ հայտարարել են, որ համաձայն չեն Լևան Իոսելիանիի այն հայտարարության հետ, որ նա ճանաչում է նորընտիր խորհրդարանը որպես «լիովին լեգիտիմ»։ Լևան Իոսելիանին Jnews-ին այս իրավիճակը մեկնաբանել է այսկերպ:
«Բանն այն է, որ սա չի խախտում Սահմանադրության ոչ մի օրենք, դրա համար էլ ասացի, որ դա լեգիտիմ է, նախ ուզում եմ հիշեցնել, որ հանրային պաշտպանի գրասենյակում կարծիքի ազատությունը սահմանափակված չէ: Այս փաստը հաստատում է դա: Երկրորդը, այս մարդիկ տարբեր կարծիքներ ունեն՝ կապված ոչ թե հանդիպման, այլ իշխանությունների լեգիտիմության հետ, ինչը կոնստիտուցիոնալիստների շրջանում վեճի առարկա է։ Նրանք այս հարցում այլ տեսակետ ունեն, քան իմը։ Ըստ այդմ՝ ոչ մի աշխատակից աշխատանքից ազատման դիմում չի ներկայացրել։ Այս խնդիրը չի ազդել որևէ աշխատողի աշխատանքի վրա: Ըստ այդմ, այն, որ ապարատում կան տարբեր կարծիքներ, արդարադատության հարցում ևս կան տարբեր կարծիքներ, ընդհանուր առմամբ նորմալ է։ Պարզապես նրանք այսկերպ հրապարակային դարձնելու որոշում են կայացրել։ Չնայած այն հանգամանքին, որ մենք տարբեր տեսակետներ ունեինք շատ հարցերի շուրջ։ Նրանք մնացել են իրենց կարծիքին, իսկ ես՝ իմ»,- ասում է Լևան Իոսելիանին։
Օմբուդսմենը պատասխանել է նաև ընտրական շրջանում ատելության խոսքի և հայատյաց հայտարարությունների կիրառմանը վերաբերող հարցերին։
«Այո, եղել է նման մի դեպք, երբ այդպիսի արշավ է եղել, որը վերաբերում է Խազարաձեին և նրա ծագմանը, և մենք դրա մասին հայտարարություն ենք արել: Ես հայտարարություն եմ գրել, որ դա բացարձակապես անընդունելի է ըստ օրենքի, ըստ սահմանադրության, ինչպես նաև բարոյական հատկանիշներով: Սա այն դեպքերից մեկն էր, երբ մենք բախվեցինք այս խնդրին, ըստ էության, եթե նման իրավիճակ ստեղծվի կամ նման արտահայտություն է հայտնվում ԶԼՄ-ներում, մենք միանշանակ նման հայտարարություն ենք անում։ Ինչ վերաբերում է նախագահ Զուրաբիշվիլիի «հայկական կարուսելի» մասին հայտարարությանը, ապա ոչ, դա, իմ կարծիքով, չի հաշվվում։ Դժվար է ասել, որովհետև սա բնականաբար հուշում է, որ այս կարուսելը հորինվել է Հայաստանում և ուրիշ ոչինչ։ Որովհետև կարելի է նույնկերպ ասել, որ սա հունական կարուսել է կամ ամերիկյան»,- ասում է նա:
