Նոյեմբերի 26-ին Սամցխե-Ջավախքի դատախազությունում ցուցմունք է տվել «Համաքաղաքացիական շարժում-Բազմազգ Վրաստան» դիտորդական կազմակերպության նախագահ Առնոլդ Ստեփանյանը՝ իշխող կուսակցության կողմից նախընտրական շրջանում վարչական ռեսուրսի օգտագործման և բնակչությանը կաշառք տալու գործով։
Ըստ Առնոլդ Ստեփանյանի՝ սա մի կողմից միջազգային հանրությանը ցույց տալու փորձ է, որ խախտումները հետաքննվում են, մյուս կողմից՝ ճնշում գործադրելու միջոց հասարակական կազմակերպությունների վրա՝ վերափոխելով նրանց ներկայացուցիչների ցուցմունքները, որոնք կարող են վերաորակվել վկաներից որպես մեղադրյալներ: Նրա խոսքով՝ իրեն հրավիրել են Սամցխե-Ջավախքի դատախազություն՝ ցուցմունք տալու երկու թեմայով՝ վարչական ռեսուրսի օգտագործման և ընտրակաշառքի։ Գործը հարուցվել է հարցազրույցի հիման վրա, որը հեռարձակվել է «Ֆորմուլա» և «Մթավարի» հեռուստաալիքներով։
«Մենք կօգտվենք առիթից և բացի երկու ուղղություններից, որոնց մասին խոսեցինք հարցազրույցի ժամանակ, լրացուցիչ նյութեր կտրամադրենք նաև այլ ուղղություններով, որտեղ մենք խախտումներ ենք արձանագրել: Եվ ոչ միայն Սամցխե-Ջավախքի շրջանում, այլև բոլոր 5 շրջաններում, որտեղ մենք դիտորդություն ենք արել: Եվ ցուցմունք տալու ժամանակ ես նրանց ասացի, որ առաջիկա օրերին մենք գրավոր կուղարկենք այդ փաստերը՝ իրենց ապացույցներով, որոնք մեր ձեռքի տակ կան»,- ասում է Առնոլդ Ստեփանյանը:
Հիշեցնենք, որ «Համաքաղաքացիական շարժում-Բազմազգ Վրաստան» դիտորդական կազմակերպության նախագահ Առնոլդ Ստեփանյանը և՛ ընտրություններից առաջ, և՛ դրանից հետո մի քանի հարցազրույց է տվել, այդ թվում՝ Ջավախքի լրատվական կենտրոնին՝ Jnews.ge-ին։ Սամցխե-Ջավախքի շրջանի դատախազությունը, ըստ Ստեփանյանի, գործ է հարուցել իր տված հարցազրույցների հիման վրա, մասնավորապես՝ իշխող «Վրացական երազանք» կուսակցության կողմից վարչական ռեսուրսի օգտագործման գործով։
