Ախալքալաքում ձյուն է տեղացել, ջրափոսերը լցվել են, որոնք էլ ավելի վտանգավոր են դարձել։ Բազում խորը փոսերով քաղաքի կենտրոնը դարձել է դժվարանցանելի, մեքենաների թիվն ավելացել է, իսկ կիսատ-պռատ փոսային նորոգումն ամբողջությամբ չի լուծել խնդիրը։
Ախալքալաքում առատ ձյուն է տեղացել, փողոցներում մեքենաների թիվն ավելացել է, քանի որ Ախալքալաքի մունիցիպալիտետի բնակիչները, ովքեր արտագնա աշխատանքի էին մեկնել, աստիճանաբար վերադառնում են և իրենց մեքենաներով երթևեկում քաղաքում։ Ախալքալաքի կենտրոնում փողոցները նեղ են և հաճախ չեն տեղավորում այնքան մեքենաներ, որքան տեղաշարժվում են քաղաքում ձմռանը և հատկապես տոն օրերին:
Այս բոլոր գործոնները ցույց տվեցին, թե որքան բարդացել է քաղաքում երթևեկությունը։ Որոշ կենտրոնական փողոցներում երկու կողմից մեքենաներ են կանգնած, իսկ մեջտեղում՝ հսկայական փոսեր են։ Վարորդները վարելիս պետք է մտածեն, թե ինչպես խուսափել վթարից կամ հսկայական, խորը փոսի մեջ ընկնելուց:
Խորը փոսերը Ճավճավաձե-Ազատություն խաչմերուկում են, նաև Ճավճավաձե-Նալբանդյան խաչմերուկում և այլն։ Փոսային նորոգումը սովորաբար կատարվում է այնպես, որ լցված ասֆալտի կցվանքների վրա աստիճանաբար նոր փոսեր են գոյանում՝ ժամանակի ընթացքում խորանալով։ Ախալքալաքի և գյուղերի ճանապարհների բարեկարգման, այդ թվում՝ փոսային նորոգման մրցույթը հայտարարվել է մի քանի անգամ։ Վերջապես ապրիլ-մայիսին այն շահել էր «ՋավախԱվտոԳզա» ընկերությունը 350 հազար լարիի չափով։ Ազատության կենտրոնական փողոցում փոսային նորոգում էր իրականացվել, սակայն հարակից փողոցներում մնացել են փոսեր, որոնք էլ ավելի են խորանալու ձմռան գալու և առատ տեղումների հետ։ Որոշ բնակիչներ իրենք ավազ կամ այլ բան են լցնում փոսերի մեջ, որպեսզի չվնասեն իրենց մեքենաները, իսկ ոմանք նույնիսկ բետոնապատել են փոսերը՝ չսպասելով փոսային նորոգմանը։
