Մեկնարկել է Վրաստանի 11-րդ գումարման խորհրդարանի առաջին նիստը։ Նիստը վարում է ամենատարեց պատգամավորը՝ Լադո Կախաձեն, որը ներկայացված կլինի որպես խոսնակ մինչև խորհրդարանի նախագահի ընտրությունը։Նիստերի դահլիճում ներկա են միայն «Վրացական երազանք» կուսակցության ցուցակով ընտրված անդամները, այդ թվում՝ ցուցակի առաջին համարը՝ Բիձինա Իվանիշվիլին։ Գրանցումն անցել է 88 պատգամավոր։
Նիստին հրավիրված են միայն պետական մարմինների ղեկավարներն ու հոգեւորականները։
Վրաստանի 11-րդ գումարման խորհրդարանը ճանաչել է բոլոր 150 անդամների լիազորությունները։ Ժամանակավոր հավատարմագրերի հանձնաժողովը հաստատել է, որ 150 ընտրված անդամների փաստաթղթերը կարգին են։ Հանձնաժողովի ղեկավարն ընթերցել է ընտրված պատգամավորների միասնական ցուցակը, որից հետո տեղի է ունեցել քվեարկությունը։
Խորհրդարանի 150 պատգամավորի լիազորությունները ճանաչել են «Վրացական երազանք»-ի 88 անդամները։
Կենտրոնական ընտրական հանձնաժողովի պաշտոնական արդյունքներով՝ 11-րդ գումարման խորհրդարան են անցել հինգ քաղաքական սուբյեկտներ։ «Վրացական երազանք» կուսակցությունը պահպանել է մեծամասնությունը, որը կներկայանա 89 պատգամավորով։ «Փոփոխությունների համար» կոալիցիան ունի 19 մանդատ, «Միասնություն-Ազգային շարժումը»՝ 16 մանդատ, «Ուժեղ Վրաստանը»՝ 14 մանդատ, իսկ «Գախարիան հանուն Վրաստանի» կուսակցությունը՝ 12 մանդատ։
