Ինչպես Jnews-ին հայտնեցին Եկամուտների ծառայության սահմանային բաժնից, Վրաստան-Թուրքիա սահմանին այլևս սահմանափակումներ չեն գործում։ Տեխնիկական խնդիրներով պայմանավորված մի քանի օր շարունակ սահմանափակումներ են գործել Վրաստան-Թուրքիա բոլոր 3 սահմանային անցակետերում։
Jnews-ն ավելի վաղ հայտնել էր, որ ընդհատումներով են գործում վրաց-թուրքական՝ «Կարծախ», «Սարփի» և «Վալե» անցակետերը։
Պարեկային ոստիկանությունից հայտնում են, որ սահմանափակումներ են եղել միայն բեռնատար մեքենաների համար Թուրքիայի կողմից, սակայն այս պահին ոչ մի սահմանափակում չի գործում։
Քանի որ բեռնատար մեքենաների դեպքում պատասխանատուն Եկամուտների ծառայությունն է, դիմեցինք նրանց։
Մեզ պատասխանեցին․ «Այո, բեռնատար մեքենաների դեպքում եղել է սպասեցում, փակ բեռ տեղափոխող բեռնատարերի համար, թեթև մարդատար մեքենաներին և մարդատար երթուղային տաքսիներին սահմանափակումը չի վերաբերվել։ Հիմա այլևս որևէ խնդիր չկա և բաց է»։
Չնայած այն հանգամանքին, որ արդեն սահմանային անցակետը գործում է սովորական աշխատանքնային ռեժիմով և առավոտից մոտ 30 բեռնատար արդեն հատել է սահմանը, սակայն միևնույնն է՝ մոտ 600 բեռնատար կանգնած է Ախալքալաքի մունիցիպալիտետի Չամդուրա գյուղի սկզբնամասից մինչև վրաց-թուրքական «Կարծախի» սահմանային անցակետ։
Jnews-ի հետ զրույցում, տեղաբնակները նշեցին, որ մոտ մեկ շաբաթ է հարկավոր, որպեսզի գոյացած հերթը վերանա։
Ախալքալաք-Կարծախ մայրուղին դժվարանցանելի է դարձել, և այդտեղով երթևեկությունը վտանգավոր է հատկապես առավոտյան ժամերին, երբ մառախուղ է։
Բեռնատարների կուտակմանը զուգահեռ տվյալ ճանապարհի ամբողջ երկյանքով աղբակույտեր են առաջացել։
Մեր հավաստի աղբյուրների տեղեկություններով, Թուրքիայի սահմանային անցակետը նախօրոք չի տեղեկացրել, որ սահմանային անցակետում իրականացվելու է բեռնատարների մուտքի համակարգչային ծրագրի փոփոխություն։
