Վրաստանի համախառն ներքին արդյունքում ոչ ֆորմալ/չդիտարկվող տնտեսության մասնաբաժինը նվազման միտում է ցույց տալիս։ Ըստ «Վրացստատ»-ի՝ 2023 թվականին այսպես կոչված ստվերային տնտեսության տեսակարար կշիռը ՀՆԱ-ում կազմել է 12,7%, ինչը 2010 թվականից ի վեր ամենացածր ցուցանիշն է (բացառությամբ 2016 թվականի, երբ ստվերի մասնաբաժինը ՀՆԱ-ում նույնն էր՝ 12,7%)։ Այս մասին գրում է bizzone.info-ն։
Անցյալ տարի երկրի ընդհանուր տնտեսությունը կազմել է 80,2 մլրդ լարի։ Ստացվում է՝ սա ստվերային տնտեսություն է բերել մոտ 10,18 մլրդ լարի։ Խոսքը վերաբերում է ոչ ֆորմալ տնտեսական գործունեությանը, որը գտնվում է հարկվող տնտեսության ստվերում։
Նշենք նաև, որ 2024 թվականի առաջին եռամսյակում ստվերի մասնաբաժինը ՀՆԱ-ում կազմել է 11,1%, իսկ երկրորդ եռամսյակում՝ 13,8%։
Հետաքրքիր է նաև, որ 2023 թվականի տվյալներով չդիտարկվող տնտեսության մասնաբաժինը հատկապես բարձր է բնակեցման և սննդի ծառայությունների ոլորտում և կազմել է 48,5%։
Բացի այդ, ստվերային տնտեսության տեսակարար կշիռը մեծ է հետևյալ ոլորտներում.
Առողջապահություն և սոցիալական ծառայություններ՝ 19%,
Արվեստ, ժամանց, հանգիստ՝ 18.3%,
Կրթություն՝ 17.9%,
Տրանսպորտ և պահեստավորում՝ 16.2%,
Հանքարդյունաբերություն՝ 16%,
Գյուղատնտեսություն, անտառային տնտեսություն և ձկնաբուծություն՝ 15,9%;
Մեքենաների և մոտոցիկլետների վերանորոգում՝ 15,4%,
Շինարարություն՝ 13.2%,
Մշակող արդյունաբերություն՝ 12,9%:
Ըստ «Վրացստատ»-ի՝ «ստվերային տնտեսության» մասնաբաժինը ամենափոքրն է մասնագիտական, գիտական և տեխնիկական գործունեության մեջ՝ 0,5%, էլեկտրաէներգիայի, գազի, գոլորշու և օդորակման մատակարարման ոլորտում՝ 1,1%, երրորդ տեղում է ՝ 2,6% մասնաբաժնով վարչական և օժանդակ ծառայություններ մատուցելու գործունեությունը:
Տեղեկատվության համար, ոչ ֆորմալ տնտեսությունը, ստվերային տնտեսությունը կամ չդիտարկվողը ներառում է վճարովի գործունեությունը, որը չի հաշվվում կառավարության կողմից հարկային, աշխատանքային կամ այլ նպատակներով, բայց օրինական է և կապված չէ հանցավոր գործունեության հետ:
