«Վրաստանի հայ համայնք» հասարակական կազմակերպության նախաձեռնությամբ՝ Հայոց ցեղասպանության, ինչպես նաև էթնիկ հայերի հարյուրամյա ջարդերի մասին պատմող գրքեր են նվիրաբերվում Վրաստանի գրադարաններին։ ՀԿ-ն նախաձեռնում է բացի գրադարաններից, գրքեր նվիրել նաև երկրում գործող մամուլին, քաղաքական կուսակցություններին, հասարակական գործիչներին, ակտիվիստներին և այլոց:
«Վրաստանի հայ համայնք» հասարակական կազմակերպության նախագահ Արթուր Միրզոյանի խոսքով, գրքերի ստեղծման միտքն առաջացել է վերջին արցախյան պատերազմից հետո, հաշվի առնելով, որ վրաց հասարակության մեջ թեման տարածված չէ և տեղեկություն չունեն կատարված իրադարձություններից, որոշել են վրացիներին հասցնել այս տեղեկությունը։ Հատկանշական է, որ գրքում ներկայացված է նաև 1918-2023 թվականներն ընկած բոլոր ոճրագործությունները:
Վրացերենով հրատարակված այս գրքերի նպատակն է հանրային տեղեկատվություն տրամադրել վերջին հարյուր տարվա ընթացքում Հայաստանի տարբեր շրջաններում Ադրբեջանի իշխանությունների կողմից պարբերաբար իրականացվող էթնիկ հայերի ջարդերի մասին՝ հանրային իրազեկվածությունը բարձրացնելու, դրանց համակարգված բնույթը հստակ ներկայացնելու նպատակով։ Գրքում ամփոփված են փաստացի տեղեկություններ 2016 թվականի ապրիլին և 2020 թվականի աշնանը սկսված պատերազմական գործողությունների ընթացքում Ադրբեջանի կողմից իրականացված ռազմական հանցագործությունների, ինչպես նաև 2022 թվականին սկսված և 2023 թվականին իրենց գագաթնակետին հասած ցեղասպան գործողությունների մասին։
Jnews-ի հետ զրույցում ՀԿ-ի նախագահ Արթուր Միրզոյանն ասաց, որ թվով 7 գիրք առաջինը նվիրաբերել են Վրաստանի խորհրդարանի ազգային գրադարանին։ Վրաստանում գործող պետական և ոչ պետական խոշոր համալսարանների գրադարաններում ևս այս պահին գրքերը հասանելի են։ Բացի կրթական հաստատություններից հայերի ջարդերի մասին պատմող գրքերն առաջիկայում հասանելի կլինեն նաև ԶԼՄ-ների, հասարակական գործիչների, կուսակցությունների և այլոց համար։
«Մեր նպատակն է, որ գրքերն առավելապես հասանելի դառնան բոլոր նրանց համար, ում կարող է այս թեման հետաքրքրել։ Նպատակն է՝ վրաց հասարակությունում բարձրացնել տեղեկատվության և իրազեկության մակարդակը։ Ապագայում ևս պլանավորում ենք հնարավորինս շատ տարածել գրքերը և հասանելիության շրջանակը լայնացնել», – ասում է Արթուր Միրզոյանը:
Վերջինս նշում է, որ բոլորը սիրով են ընդունել գրքերը, օրինակ՝ Սև Ծովի համալսարանից ասել են, որ իրենց գրադարանը փոքր է, հաճախ չէ, որ գրքեր են ստանում և խնդրել են իրենց 2 հատ նվիրել, մեկը՝ որ գրադարանում մնա, իսկ մյուսը՝ ուսանողներին տան, երբ նման թեմատիկայով աշխատանք ունենան գրելու:
Այս պահին գրքերը հասանաելի են՝
Կենտրոնական գրադարանում, ԹՊՀ-ի, Իլիայի պետական համալսարանի, Վրաստանի ազգային համալսարանի, Սև ծովի միջազգային համալսարանի, Դավիթ Աղմաշանեբելիի անվան Վրաստանի համալսարանի, Վրաստանի համալսարանի, Ազատ համալսարանի, Քութայիսիի Ակակի Ծերեթելիի անվան համալսարանի գրադարաններում։
Ադրբեջանի ցեղասպան քաղաքականությունը հայերի նկատմամբ 1918-2023 թթ․․ վերտառությամբ գրքին կարող եք ծանոթանալ այս հղումով։
