Այսօր՝ հոկտեմբերի 23-ին, Ախալքալաքի կենտրոնական զբոսայգում տեղի ունեցավ «Տրիբունա» քաղաքական կուսակցության ամփոփիչ հանդիպումն Ախալքալաքի բնակիչների հետ։ Կուսակցության առաջնորդ Դավիթ Ճիճինաձեն, կուսակցության ներկայացուցիչներ՝ Դավիթ Ռստակյանը, Նորայր Տեփոյանը և Գագիկ Մելքումովը խոսեցին տարածաշրջանի խնդիրների ու դրանց լուծման ուղիների մասին։
Ճիճինաձեն նշեց, որ պատգամավորները միշտ լռում են հայերի համար ամենակարևոր ամսաթվին ևս՝ ապրիլի 24-ին, ոչ ոք չի բարձրացնում այդ հարցը։
«Ես ուզում եմ խրախուսել մեր կուսակցության անդամներին, մեր համակիրներին, որ ակտիվ մասնակցեն ընտրություններին, քանի որ «Տրիբունա»-ն պետք է հավաքի այս տարածաշրջանում շատ ձայներ, որպեսզի հասկանան, որ այն քաղաքականությունը, որը «Տրիբունան» վարում է հայ բնակչության հադեպ, արդարացված է և ճիշտ։ Հայ ժողովուրդն ինձ համար շատ թանկ է։ Ուզում եմ ասել՝ Դավիթ Ճիճինաձեն, «Տրիբունա» քաղաքական կուսակցությունը միշտ կկանգնի հայ ժողովրդի կողքին, առավելապես այս տարածաշրջանում, քանի որ այս տարածաշրջանը Վրաստանի համար շատ մեծ կարևորություն ունի, սահմանային տարածաշրջան է, և այստեղ դուք ամրացնում եք Վրաստանի շահերը», – դիմելով ներկաներին ասաց Դավիթ Ճիճինաձեն։ Միևնույն ժամանակ բոլորին հորդորեց ակտիվ մասնակցել ընտրություններին։
Jnews-ի հետ զրույցում Ճիճինաձեն նշեց, որ Ախալքալաքի շրջանն անտեսված է կառավարության կողմից։
«Ախալքալաքը շատ անտեսված է կառավարության կողմից, այնպիսի տպավորություն է, որ կարծես իրենց պատասխանատվության հարցը չէ այստեղի խնդիրները, և այդ խնդիրները կոնկրետ ինչ-որ մարդկանց են հանձնել։ Ես Ջավախեթի 2016 թվականից շատ հաճախ եմ այցելում, պրակտիկորեն այստեղի բոլոր լիդերներին ճանաչում եմ, այդ մարդիկ արժանավոր ներկայացուցիչներ են իրենց հայրենիքի համար, ի նկատի ունեմ Վրաստանի։ Այնպիսի մարդիկ կան մեր կուսակցությունում, որոնց ժամանակին չգիտես ինչու մեղադրում էին անջատողականության մեջ։ Սակայն այս ժողովուրդը շատ հայրենասեր է, շատ են սիրում Վրաստանը, ինչպես կարելի է նրանց մինուսը համարել այն, որ նրանք սիրում են իրենց ազգը։ Հակառակը՝ ես ողջունում եմ այդ փաստը, մարդը պետք է սիրի իր ազգը, և համապատասխանաբար, հետո կսիրի ուրիշի ազգը։ Եթե անձը չսիրի իր անձը, բացառվում է, որ սիրի ուրիշինը»։
Վերջինս առանձնացրեց Ախալքալաքի մունիցիպալիտետում կարտոֆիլի իրացման հետ կապված խնդիները, որոնք բնակիչներն են բարձրացրել հանդիպումների ժամանակ։
«Շրջանում միշտ կարտոֆիլի իրացման խդնիր կա։ Երբ բերքն առատ է լինում, այն շատ էժան է, այդ իսկ պատճառով՝ կառավարությունը պետք է ստեղծի կոոպերատիվներ, կառուցի պահեստներ։ Կա նաև պանրի իրացման խնդիր, օրինակ՝ մսի վաճառքի համար թույլտվություն պետք է ստանան Ախալցիխեից, տեղում չկա։ Ես կարծում եմ, որ էլեմենտար ուշադրության դեպքում այս հարցերին կարելի է լուծում տալ։ Շատ մեծ խնդիրներ կան բանկային ոլորտում։ Մարդկանց ստորագրել են տալիս պայմանագրերի տակ, որտեղ չգիտեն ինչ է գրված, քանի որ այդ պայմանագրերը վրացերեն են, և ստիպում են մարդկանց ստորագրել, չկա հատուկ ծառայություն, որպեսզի մարդիկ իմանան ինչի տակ են ստորագրում, չի թարգմանվում։ Ազգային փոքրամասնությունների համար մենք պետք է ապահովենք համապատասխան պայմաններ, որպեսզի նրանք մինչև վերջ լինեն ինտեգրված։ Եթե նրանք վրացերեն չգիտեն, դա չի նշանակում, որ այս երկրի զավակները չեն և չօգտվեն իրենց հասնող աջակցությունից, որն իրենց պետք է»։
Ճիճինաձեն անդրադարձավ Ախալքալաքի բնակիչներին հուզող ևս մեկ խնդրի՝ քաղաքացիության հարցին։ Նշելով, որ դժվար պայմանների պատճառով ժամանակին շատերն են գնացել և ստացել այլ երկրի քաղաքացիություն։
«Եթե նրանք այս երկրի զավակներն են և ունեն ցանկություն, որ լինեն Վրաստանի քաղաքացիներ և ծառայեն այս երկրին, ինչու՞ պետք է նրանց համար խնդիրներ առաջացնենք։ Կան հավաքված շատ հարցեր։ Կարծում եմ, որ մեր կուսակցության անդամները, ովքեր այսօր մասնակցում են ընտրություններին, այն մարդիկ են, ովքեր պատրաստ են այս խնդիրները լուծել, բարձր խոսել դրանց մասին»։
Խոսելով Ախալքալաքում նախընտրական շրջանի մասին, վերջինս նշեց, որ իրենց կուսակցությունը խնդիր է ունեցել դիտորդների հետ կապված։
«Մեզ համար շատ լուրջ խնդիրներ ստեղծեցին դիտորդների հետ կապված, որպեսզի մենք չկարողանանք պաշտպանել մեր ձայները։ Վախեցնում են դիտորդներին, մարդկանց վրա բռնանում են, շատ տհաճ ձևով են վարվում հատուկ ծառայությունները, ուժային ինստիտուտները։ Իբր այս տարածաշրջանում անջատողականության վտանգ կա, մարդկանց մեղադրում են այնպիսի բաներում, որ այս մարդկանց մտքում երբեք չի էլ եղել։ Եվ երբ պետությունն այսպես վատ է վարվում իր քաղաքացու հետ, կարծում եմ, որ բոլոր քաղաքական գործիչները, ովքեր համաձայն չեն պետության քաղաքականության հետ, պետք է գան այստեղ և ակտիվ աջակցություն ցուցաբերեն տեղի բնակիչներին», – եզրափակեց Ճիճինաձեն։
Նշենք, որ «Տրիբունա» քաղաքական կուսակցությունը հանդես է գալիս 21 համարի ներքո։ Կուսակցության ընտրացուցակում 60 թեկնածու է ընդգրկվել։ Այդ թվում՝ ազգությամբ 7 հայ, որոնցից 2-ն Ախալքալաքից։ 7 համարի ներքո ներկայացված է Գագիկ Մելքումովը, 14 համարի ներքո՝ Դավիթ Ռստակյանը, 32 համարը ներկայացնում է Էլվիրա Արիկովան, 38 համարը՝ Յուրի Եղիազարյանը, 42 համարի ներքո՝ Նորայր Տեփոյանը, 48 համարը ներկայացնում է Մնացական Բադալյանը և 52 համարի ներկայացնում է Ալբերտ Բադալյանը։ Նշենք, որ հենց ինքը՝ Դավիթ Ճիճինաձեն, ընտրացուցակում հանդես է գալիս 8-րդ համարի ներքո։
