Վարչապետ Իրակլի Կոբախիձեն հայտարարել է, որ հոկտեմբերի 23-ին Թբիլիսիի Ազատության հրապարակում «Վրացական երազանքի» նախընտրական հանրահավաքը կանցկացվի «լուսավոր եվրոպական ապագա» նշանաբանով։ Այս մասին հայտնում է Newsgeorgia-ն։
«Մեզ անհրաժեշտ է լուսավոր եվրոպական ապագա մեր երկրի համար, և դա կլինի գլխավոր ուղերձը»,- հայտարարել է Կոբախիձեն։
Իշխող կուսակցությունն ասում է, որ արևմտյան գործընկերների հետ հարաբերություններում ճգնաժամը ժամանակավոր է, և ամեն ինչ կվերականգնվի Ուկրաինայի պատերազմի ավարտից և, առհասարակ, ամբողջ աշխարհում կայունության հաստատումից հետո։ Իշխող կուսակցությունն ասում է, որ մինչև 2030 թվականը Վրաստանը կդառնա ԵՄ անդամ «իր արժեքներով և արժանապատվությամբ»։
«Գլխավորն այն է, որ մենք ավելի ուժեղ դառնանք, և նրանք մեզ կաղաչեն, որ մենք մտնենք Եվրոպա։ Սա ես ձեզ երաշխավորում եմ… Ես Ուկրաինայի մեծ ընկերն եմ, ինձ շատ անհանգստացնում է այն, ինչ կատարվում է այնտեղ, ես առանձնապես չէի ցանկանա այսկերպ մտնել Եվրոպա, ոչ էլ այն, ինչ հիմա կատարվում է Մոլդովայում, ինձ հետաքրքիր չէ մտնել այս ձևով»,- այս շաբաթ տված հարցազրույցում ասել է «Վրացական երազանքի» հիմնադիր Բիձինա Իվանիշվիլին:
«Վրացական երազանքը» փորձում է ընտրություններից առաջ հարթեցնել վրաց-ամերիկյան հարաբերությունների թեման։ Նախօրեին արևմտյան գործընկերների հայտարարությունների ֆոնին վրացական կառավարության գործողությունների հետևանքով ժողովրդավարության հետընթացի մասին Բիձինա Իվանիշվիլին հայտարարել է ԱՄՆ-ի հետ հարաբերությունների վերակայման և ընտրություններից հետո դեսպանի հետ անձնական հանդիպման մասին։
Հոկտեմբերի 17-ին ԵՄ ղեկավարները պաշտոնապես հայտարարեցին միությանը Վրաստանի անդամակցության կասեցման մասին։ Պատճառը նրանք անվանել են Վրաստանի կառավարության գործողությունները, որոնք հակասում են եվրոպական արժեքներին ու սկզբունքներին, ինչպես նաև բարձրաստիճան պաշտոնյաների ագրեսիվ և ապատեղեկատվական հռետորաբանությանը։ Վրաստանում ԵՄ դեսպան Պավել Հերչինսկին ընդգծել է, որ «երկիրը չի դառնա Եվրամիության անդամ ոչ այսօր, ոչ վաղը, ոչ 2030 թվականին», եթե որոշեն այն վերածել «միակուսակցական պետության, որտեղ ընդդիմությունն արգելվում է, իսկ քաղաքացիական հասարակությունը վտարվում է»։
Վրաստանի հետ հարաբերությունների վերանայման և դեմոկրատիայի հետընթացի համար պատասխանատու անձանց համար անձնական պատժամիջոցների փաթեթի պատրաստման մասին ԱՄՆ Պետդեպարտամենտը հայտարարել էր ամռան սկզբին։
Աղբյուրը՝ Newsgeorgia.
