Երեկ՝ հոկտեմբերի 18-ին, Ախալքալաքում, տեղի ունեցավ Վրաստանի Կենտրոնական ընտրական հանձնաժողովի (ԿԸՀ) ներկայացուցիչների հանդիպումն Ախալքալաքի ընտրողների հետ, որի ընթացքում ԿԸՀ ներկայացուցիչները խոսեցին ընտրությունների կարևորության մասին և ներկայացրեցին էլեկտրոնային ընտրությունների կարգը։ Հանդիպումը կազմակերպել էին «Հասարակական քաղաքացիական շարժում – Բազմազգ Վրաստան» հասարակական կազմակերպությունը և IFES միջազգային կազմակերպությունը։
Վրաստանի Կենտրոնական ընտրական հանձնաժողովի ներկայացուցիչների հետ հանդիպմանը ներկա էին ինչպես երիտասարդ ընտրողներ, այնպես էլ մեծահասակներ։
«Այցի նպատակն է երիտասարդ ընտրողներին տեղեկացնել այն ընթացակարգերի մասին, որոնք տեղի կունենան հոկտեմբերի 26-ին՝ խորհրդարանական ընտրությունների ժամանակ։ Այս ընտրությունները շատ կարևոր ընտրություններ են երկրի համար, քանի որ առաջին անգամ ընտրողների 90%-ը կքվեարկի էլեկտրոնային եղանակով, իսկ մարզերում ևս կան ընտրատեղամասեր, որոնք քվեարկելու են էլեկտրոնային եղանակով, ուստի մեզ համար շատ կարևոր է տեղեկացնել բոլորին, հատկապես երիտասարդ ընտրողներին, այն ընթացակարգերի մասին, որոնք պետք է անցնել քվեարկելու համար»,- ասաց Վրաստանի Կենտրոնական ընտրական հանձնաժողովի փոխնախագահ Գիորգի Շարաբիձեն։
Հանդիպմանը նշվեց, որ, ընտրություններին, ազգային փոքրամասնությունների ներկայացուցիչներն ունեն հավասար մասնակցության իրավունք, իսկ էթնիկ փոքրամասնությունների համար քվեաթերթիկները տպագրվում են հայերենով, ինչպես նաև հայերեն լեզվով տպված են տեղեկատվական գրքույկներ։ Ընտրական վարչակազմի ներկայացուցիչները նշեցին, որ իրենց նպատակն է, անկախ լեզվական խոչընդոտից, բոլորի համար ստեղծել հավասար և ազատ մթնոլորտ։
Գիորգի Շարաբիձեն նշեց յուրաքանչյուր ընտրողի ընտրական ընթացակարգի իմացության և էլեկտրոնային քվեարկության ընթացակարգի իմացության կարևորությունը։ Ներկաներին հայերենով ցուցադրվեց էլեկտրոնային քվեարկության ընթացակարգի մասին պատմող տեսանյութ։
Բոլորին բաժանվեց էլեկտրոնային ընտրության ընթացակարգի վերաբերյալ բուկլետ-ուղեցույցներ, ինչպես նաև ընտրություններին ազգային փոքրամասնությունների հավասար մասնակցության վերաբերյալ բուկլետներ։