ԿԸՀ-ն ավարտել է ընտրողների միասնական ցուցակի մշակման աշխատանքները. հոկտեմբերի 26-ին կայանալիք ընտրություններին ընտրողների ընդհանուր թիվը կազմում է 3 մլն 508 հազար 294 ընտրող: Էլեկտրոնային տեխնոլոգիաների կիրառմամբ ընտրություններին կմասնակցի 3 միլիոն 113 հազար 747 ընտրող, ճեպազրույցում հայտարարել է ԿԸՀ մամուլի խոսնակ Նաթիա Իոսելիանին։
Նրա խոսքով, այս տարի առաջին անգամ ընտրություններին մասնակցելու հնարավորություն կունենա 135 հազար 922 երիտասարդ։
«64238 ընտրող դիմել է ընտրական վարչություն՝ շարժական քվեատուփի խնդրանքով։ Այլ նահանգներում ստեղծված ընտրատեղամասերի հատուկ ցուցակներում ընտրողների թիվը 95 910 է։
Ընտրողներին կսպասարկեն ընդհանուր առմամբ 3 111 ընտրատեղամասեր։ Վրաստանում բացված է 3 044 ընտրատեղամաս, այդ թվում՝ 13-ը՝ ստեղծված բացառման դեպքերի համար, որից 12-ը՝ քրեակատարողական հիմնարկներում, 1-ը՝ հոգեբուժական կենտրոնում։ Ինչ վերաբերում է արտերկրում ստեղծված ընտրատեղամասերին, ապա 42 երկրի 53 քաղաքներում ստեղծվել է 67 ընտրատեղամաս։
Ընտրությունների հայտարարման պահից մինչև այսօր ընտրողները ԿԸՀ կայքում և բջջային հավելվածում ստուգել են ընտրողների միասնական ցուցակի տվյալները 1 311 773 անգամ, իսկ արագ վճարման ապարատների միջոցով՝ 29 277 անգամ։
Այն բանից հետո, երբ ընտրական վարչությունը ստացել է բոլոր համապատասխան գերատեսչություններից ցուցակները, տվյալները մշակվել և բաժանվել են ըստ ընտրատարածքների և տեղամասերի: ԿԸՀ պաշտոնական կայքում այս պահին ընտրողների թարմացված միասնական ցուցակը հասանելի է բոլորին։
Կարևոր է նաև նշել, որ ընտրացուցակների հանրային տեղեկատվության տարբերակը հասանելի է գրանցված կուսակցություններին և ընտրական օրենքով սահմանված դիտորդական կազմակերպություններին: Ընտրողները կարող են ծանոթանալ նաև ցուցակի հրապարակային տարբերակին անմիջապես ընտրատեղամասերում։
Ընտրական տարվա ընթացքում տարբեր ժամանակներում 4 կուսակցություն և 2 հասարակական կազմակերպություններ ընտրողների միասնական ցուցակ են հայցել ընտրական վարչությունից, ինչը հաստատում է, որ ընտրացուցակի առկայությունը ստուգելու նպատակով համապատասխանում է օրենքին և միջազգային չափանիշներին»,- ասված է հայտարարության մեջ։
