Կումուրդոն աղբի հարցով խնդրահարույց գյուղերից է։ Գյուղում կան բազմաթիվ արհեստական աղբավայրեր, որոնք առաջացել են թե՛ բնակիչների, թե՛ Սպասարկման կենտրոնի մեղքով։ Շատ բնակիչներ պատրաստ են վճարել Սպասարկման կենտրոնի ծառայությունների համար՝ իրենց գյուղում մաքրությունը պահպանելու նպատակով։
Ամռանն Ախալքալաքի սպասարկման կենտրոնը ստացել է 198 հազար 666 լարի արժողությամբ 117 աղբաման և դրանք բաժանել 24 գյուղերի։ Նոր աղբարկղեր տեղադրելուց հետո նրանք սկսեցին վճարներ հավաքել ևս 12 գյուղերից աղբահանության համար։ Այս խմբաքանակից Կումուրդոյում աղբամաններ չեն տեղադրվել: Այնուհետև Սպասարկման կենտրոնը Jnews-ին տված մեկնաբանությունում նշել է, որ հաջորդ անգամ, երբ արկղերը ստանա, դրանք կտեղադրի Կումուրդո գյուղում, որտեղից կսկսեն հավաքել նաև աղբահանության վճարները։
Jnews-ը զրուցել է գյուղի բնակիչների հետ այն մասին, թե արդյոք նրանք պատրաստ են վճարել այս ծառայության համար։ Jnews-ի հետ զրույցում գյուղացիները նշեցին, որ իրենց գյուղում նոր աղբամաններ չեն հայտնվել, սակայն դրանք անհրաժեշտ են, որպեսզի ամբողջ գյուղին բավարարի։
«Այժմ մեր ունեցած աղբամանները քիչ են, հեռավոր թաղամասերում ևս մարդիկ ուզում են, որ մաքուր լինի: Դե նրանք էլ չեն ուզում աղբը տանել հեռու, ստիպված ինչ-որ տեղ նետում են։ Հետո դա անասուններն են ուտում, հիվանդանում, և դա վնաս է բոլորիս համար։ Եթե աղբամանների քանակն ավելացվեր, ավելի լավ կլիներ»,- մեկնաբանեց Ալբերտ Չոլախյանը։
Մեր հարցված բնակիչները չէին լսել այն մասին, որ իրենց գյուղում աղբահանության համար վճար են ուզում մտցնել, սակայն մեծամասնությունը նշեց, որ դեմ չէ այս նորամուծությանը։
«Սա ընդհանուր հարց է: Մենք երկուսով չենք կարող խոսել բոլորի փոխարեն: Պետք է ժողով անել և բոլորին հարցնել: Իմ անձնական կարծիքն այն է, որ ամսական 50 թեթրին դա ոչինչ է։ Բայց մեր գյուղում 400 տուն ունենք, ուրեմն մեզ պետք է 100, կամ գոնե 50 աղբարկղ»,- ասաց գյուղի բնակիչ Մարտին Սահակյանը։
Գյուղի բնակիչներից մեկը, ով չցանկացավ ներկայանալ, նշեց, որ աղբահանության համար պետք է վճարի պետությունը, ոչ թե գյուղացիները, թեպետ նա դեմ չէ վճարի հավաքմանը։
«Ես չեմ լսել այն մասին, որ գյուղում ուզում են աղբի համար վճար մտցնել։ Սա ոչ միայն մեզ է պետք, սա բոլորին է պետք, սա մաքրություն է, սա կուլտուրա է: Դա պետք է անի պետությունը։ Դե, իհարկե, եթե վճար մտցնեն, ես դեմ չեմ լինի, ոչ ոք էլ դեմ չի լինի»։
Նշենք, որ Կումուրդոյում կա ավելի քան 400 տնտեսություն և ավելի քան 2000 մարդ։ Գյուղում այս պահին կա 14 աղբաման։
Հիշեցնենք, որ Ախալքալաքի մունիցիպալիտետի մեկ անձի համար աղբահանության սակագինը սահմանվում է 50 թեթրի, եթե ընտանիքում չորս հոգուց ավելի է, ապա վճարը 2 լարի է, իսկ իրավաբանական անձինք 1 խ/մ աղբի համար վճարում են 25 լարի։ Վերահսկիչները, ովքեր բնակիչներից բաժանորդավճարներ են հավաքում, ստանում են հավաքված գումարի 30%-ի չափով աշխատավարձ։
