2024 թվականի հոկտեմբերի 26-ին Վրաստանում տեղի կունենան խորհրդարանական ընտրություններ, բնակչության մեծամասնությունը կարծում է, որ այդ ընտրությունները պատմականորեն կարևոր են երկրի համար։ Jnews-ն Ախալքալաքում հարցում անցկացրեց, պարզելու, թե ինչպես է բնակչությունը տրամադրված, գիտեն արդյոք ընտրությունների, էլեկտրոնային համակարգի մասին և ինչ են մտածում այդ ամենի մասին։
Խորհրդարանական ընտրություններին մնացել է 25 օր։ Ախալքալաքում նախընտրական իրավիճակը հանգիստ է: Մունիցիպալիտետի բնակիչները հիմնականում անտարբեր են ընտրությունների նկատմամբ և փորձում են չխոսել իրենց քաղաքական հայացքների մասին։
JNEWS-ն Ախալքալաքի կենտրոնական փողոցներում հարցում է անցկացրել 57 մարդու հետ։ Հիմնական հարցերը հետևյալն էին.
• Դուք գիտեք, որ շուտով ընտրություններ են։
• Գիտեք, որ քվեարկելու եք էլեկտրոնային եղանակով։
• Ինչ եք մտածում էլեկտրոնային քվեարկության համակարգի մասին:
57 հարցվածներից միայն 9-ը պատասխանեցին հարցերին, այն էլ շատ զուսպ ու դժկամորեն։ Մնացած 48-ը, լսելով մեր հարցերը, հրաժարվեցին պատասխանել։
Մեջբերում ենք հարցվածների պատասխանները.
«Այո, ես գիտեմ ընտրությունների մասին։ Հասմիկը (խմբ.՝ Ընտրատարածքային հանձնաժողովի նախագահը) երկու օր այգում բացատրում էր, բայց ես չէի լսում, չգիտեմ, էլեկտրոնային տարբերակով կարող եմ քվեարկել, թե ոչ։ Ես չգիտեմ, կկարողանան կեղծել էլեկտրոնային ձևաչափի դեպքում»,- ասաց Վիոլետա Քթոյանը։
Կենտրոնական զբոսայգում նարդի խաղացող տարեցները՝ մոտ 12 հոգի, սկզբում հրաժարվեցին պատասխանել, բայց հետո նրանցից մեկը, ներկայանալով որպես Արտյուշ Այվազյան, բոլորի անունից ասաց հետևյալը և խնդրեց անպայման գրել այդ մասին.
«Մինչև մեր հարցը չլուծվի, մենք չենք քվեարկելու, մենք ուզում ենք, որ մեզ՝ տարեցներիս սենյակ հատկացնեն, որ այնտեղ հավաքվենք, ժամանակ անցկացնենք։ Արդեն ցրտել է: Ի միջի այլոց, բոլորը գիտեն, որ ընտրություններն էլեկտրոնային են, ես չեմ կարող, թոռս կգա, ինձ կօգնի: Նա երիտասարդ է, ամեն ինչ գիտի, միայն թե նրանք սենյակի հետ կապված մեր հարցը լուծեն։ Ես իմ բոլոր հարազատներին ու ծանոթներին կբերեմ ընտրությունների»,- ասաց Արտյուշ Այվազյանը։
Վոլոդյա Սերոբյանը տեղեկացված է ընտրությունների մասին.
«Ես գիտեմ ընտրությունների մասին, ինձ թվում է, որ էլեկտրոնային ընտրությունները դժվար չի լինի կազմակերպել, և կարծում եմ անհնար կլինի կեղծել»։
Հերիքնազ Բալասանյանը պատասխանեց, որ տեղյակ է առաջիկա ընտրությունների մասին, բայց չգիտի, որ դրանք լինելու են էլեկտրոնային ձևաչափով։
«Եթե ցանկանան կեղծել, ամեն ինչ էլ հնարավոր է»:
Վաչիան գյուղից Անդրանիկ Պապոյանը դեռ մտածում է՝ գնա ընտրության, թե ոչ.
«Մեզ ոչ մի կերպ չեն օգնում, մեր ճանապարհն արդեն ինչքան ժամանակ է վատ վիճակում է, ընտրություններին մասնակցելու իմաստ չեմ տեսնում»։
Հարցվածներից մեկը, ով չներկայացավ, ասաց, որ ընտրություններն ոչինչ չեն փոխում, և ինքը որևէ հույս չունի ընտրություններից։
«Ընտրություններն ոչինչ չեն փոխում, ամեն ինչ միշտ էլ հնարավոր է։ Ինձ շատ են խաբել, մի բան ասում են, լրիվ ուրիշ բան անում։ Ես արդեն մեծ եմ ու չեմ հիշում, որ ինչ որ բան խոստացել ու արել են, իրենց խոստումները երբեք չեն արել, էլ չեմ ուզում խաբված լինել, գուցե գնամ ընտրության, բայց որևէ հույս չկա, որ ինչ-որ բան կփոխվի»։
Ոմանք կարծում են, որ ընտրատեղամասում իրենց կբացատրեն էլեկտրոնային քվեարկության սկզբունքը։
«Չգիտեմ, կարող եմ քվեարկել էլեկտրոնային եղանակով։ Հավանաբար մեզ այնտեղ կբացատրեն: Գլխավորն այն է, որ բնակչությանը նրանք աշխատանքով ապահովեն, որ մենք կարողանանք ապրել»։
Մամիկոն Բադալյանը չգիտի, թե էլեկտրոնային ընտրություններն ինչպես են անցկացվելու, բայց իսկապես հույս ունի, որ իրեն կօգնեն։
«Իրականում, ես հին ձևով էլ էի դժվարանում, իսկ հիմա չգիտեմ, թե ինչ եմ անելու, բայց ինձ թվում է, որ ինչպես բանկում, ամեն ինչ քո փոխարեն կանեն, մի անհանգստացեք, ում պետք է նրան էլ կանցկացնեն»:
