HEKS-EPER Georgia կազմակերպության կողմից, ԵՄ ֆինանսական աջակցությամբ իրականացվող «Քաղաքացիական հասարակության հզորացում սոցիալական, տնտեսական և քաղաքական կյանքում հավասար և լիարժեք մասնակցության համար» ծրագրի շրջանակներում, երեկ՝ սեպտեմբերի 26-ին, Սամցխե-Ջավախքի Հասարակական կազմակերպությունների հարթակն Ախալքալաքում անցկացրեց հանդիպում երիտասարդության, հասարակական կազմակերպությունների և քաղաքական կուսակցությունների ներկայացուցիչների մասնակցությամբ: Հանդիպման հիմնական թեման երիտասարդների ինքնահաստատման խնդիրներն ու ուղիներն էին։
Հանդիպումը տեղի ունեցավ Jnews-ի գրասենյակում։ Հանդիպմանը հրավիրված էին Ջավախքում գործող հինգ կուսակցությունների ներկայացուցիչներ։ Սակայն հանդիպմանը չէին եկել «Միացյալ ազգային շարժում», «Վրացական երազանք» և «Լելո» կուսակցությունների ներկայացուցիչները։ Մասնակցում էին «Հանուն փոփոխությունների» կոալիցիայի մարզային ներկայացուցիչ Նիկոլոզ Բեգիաշվիլին և «Գախարիան՝ հանուն Վրաստանի» կուսակցության ներկայացուցիչ Սոֆո Խորգուանին։ Հանդիպման մասնակիցների թվում էին Վրաստանի բուհերը վերջերս ավարտած 5 երիտասարդներ, հասարակական կազմակերպությունների ներկայացուցիչներ և ISFED կազմակերպությունից դիտորդ։
Ջավախքի երիտասարդները հետաքրքրվեցին կուսակցությունների ծրագրերով, որոնց ներկայացուցիչները ներկա էին, երիտասարդները խոսեցին երիտասարդների զբաղվածության խնդրի, «4+1» ծրագրի խնդիրների, գյուղատնտեսական խնդիրների, մունիցիպալիտետում հասարակական տրանսպորտի բացակայության, գազիֆիկացման, տարածաշրջանի զարգացման և շատ ավելիի մասին։
Խանդո գյուղից Ֆենյա Թորոսյանը նշեց մունիցիպալիտետում տրանսպորտի բացակայության մասին, ինչը թույլ չի տալիս երիտասարդներին ակտիվորեն մասնակցել որևէ գործունեության։
Փոքր Սամսար գյուղից Վարդուհի Կուրղինյանն ասաց, որ տարրական պայմանների բացակայությունը ստիպում է երիտասարդներին ինքնադրսևորվել Ջավախքից դուրս՝ Թբիլիսիում կամ այլ երկրներում։
Ախալքալաքի բիզնես կենտրոնի տնօրեն Մախարե Մացուկատովը խոսեց գյուղատնտեսության, որոշ ծրագրերի մասին, որոնք արդյունավետ չէին, ապակենտրոնացումից, ոռոգման համակարգի խնդիրներից։
Նինոծմինդայից Գրիգոր Սահակյանը նշեց Նինոծմինդայի որոշ գյուղերի գազիֆիկացման խնդիրը, երիտասարդության զբաղվածության խնդիրները և այլ խնդիրներ։
Կուսակցության ներկայացուցիչներն այս հարցերի վերաբերյալ կոնկրետ ծրագիր չներկայացրեցին, սակայն նշեցին, որ դրանցով նրանք կզբաղվեն:
«Գախարիան՝ հանուն Վրաստանի» կուսակցությունից Սոֆո Խորգուանին ասաց, որ իրենց կուսակցությունը ստեղծել է ծրագիր, որի համաձայն շրջանային եկամուտները կմնան հենց շրջաններում։
«Մեր ծրագրով տեղական եկամուտը մնում է շրջանում, որպեսզի նրանք կարողանան ավելի ուժեղանալ և զարգանալ: Ես արդեն նամակներ եմ ուղարկել տրանսպորտի հետ կապված։ Ջավախքը զբոսաշրջության մեծ ներուժ ունի, որը պետք է զարգացնել։ Դուք կարող եք ողջ տարին հյուրընկալել զբոսաշրջիկներին»,- ասաց Սոֆո Խորգուանին։
«Հանուն փոփոխությունների» կոալիցիայից Նիկոլոզ Բեգաշվիլին ասաց, որ տեղացի երիտասարդներից բացի, ոչ ոք ավելի լավ չգիտի շրջանի խնդիրների մասին։
«Ինչու են հեռանում մարզերից, որովհետեւ այնտեղ տնտեսությունը զարգացած չէ, բիզնես չկա, ուստի և աշխատանք չկա, հետևաբար երիտասարդները գնում են։ Մենք ունենք ծրագիր, ըստ որի կարտոֆիլը պետք է վերամշակվի և վաճառվի տեղում»,- ասաց Նիկոլոզ Բեգաշվիլին։
Հանդիպման ավարտին կարճ քննարկում եղավ այն մասին, թե ինչ է պետք անել, որպեսզի երիտասարդները չձգտեն հեռանալ մարզից։
