Այսօր՝ սեպտեմբերի 7-ին, Գրանդ Մուր հյուրանոցի նիստերի դահլիճում տեղի ունեցավ Մեդիագրագիտության փառատոնը։
Փառատոնն անցկացվում է «Մեդիագրագիտությունը Վրաստանում ժողովրդավարական և կայուն հասարակության համար» ծրագրի շրջանակներում և իրականացվում է չեխական «People in Need» կազմակերպության կողմից՝ Ռադիո Մառնեուլիի հետ համագործակցությամբ՝ Չեխիայի Հանրապետության Արտաքին գործերի նախարարության աջակցությամբ։ Մեդիագրագիտության փառատոնի անալոգը 1999 թվականից Չեխիայում անցկացվող One World-ն է, որի շահառուները դպրոցականներն են։
Ախալքալաքում անցկացվող փառատոնը ֆինանսավորվում է Վրաստանում Չեխիայի դեսպանատան կողմից և Չեխիայի արտաքին գործերի նախարարության աջակցությամբ։ Այսօրվա միջոցառմանը ներկա էին նաև Չեխիայի դեսպանատան ներկայացուցիչներ, Չեխական կենտրոնի Թբիլիսիի ներկայացուցիչը և PIN Georgia-ի տնօրենը։ Ներկա էին նաև Ախալքալաքից և գյուղերից երեխաներ, տեղական հասարակական կազմակերպությունների ներկայացուցիչներ։
Խոսելով այսօրվա մասին՝ PIN Georgia-ի տնօրեն Քելլի Հայնսը նշել է դպրոցահասակ երեխաների ճշմարտացի տեղեկատվության, մասնակցության և ներգրավվածության կարևորությունը, քանի որ նրանք են երկրի ապագան։
«Ես շատ ուրախ եմ տեսնել երիտասարդությանը և հատկապես երիտասարդ կանանց: Ձեր մասնակցությունը նման միջոցառումներին շատ կարևոր է, քանի որ դուք այս երկրի, այս համայնքի ապագան եք։ Խնդրում եմ ակտիվ լինել քննարկումներում։ Մենք պատրաստվում ենք դիտել մի քանի վավերագրական տեսանյութեր, խնդրում եմ, մի փոքր այլ կերպ մտածեք, թե ինչպես ենք մենք ընկալում այս աշխարհը։ Մեդիագրագիտության նախագիծը գործում է արդեն 4 տարի այն շրջաններում, որտեղ խիտ են ապրում էթնիկ փոքրամասնությունները։ Այս նախագծի կարևորությունն այն է, որ այս շրջանների բնակիչները տեղեկացված լինեն և կարողանան տարբերել ապատեղեկատվությունն իրական տեղեկատվությունից, ինչը շատ դժվար է բոլորիս համար: Այսօր մեզ հասանելի են բազմաթիվ տեղեկություններ, որոնցից շատ դժվար է տարբերել, թե որն է ճիշտը, որը` կեղծը»,- ասել է PIN Georgia-ի տնօրեն Քելի Հայնսը:
Փառատոնի ընթացքում, բացի մեդիա գրագիտության մասին ֆիլմերից, սոցցանցերում ցուցադրվեցին ակտիվության և ճշմարտացիության մասին վավերագրական ֆիլմեր։
Վավերագրական ֆիլմերի փառատոնը կանցկացվի նաև Բոլնիսիում, որտեղ կոմպակտ ապրում են էթնիկ ադրբեջանցիներ, իսկ եզրափակիչ փառատոնը կկայանա Թբիլիսիում։
