Բազուկը հայկական ավանդական խոհանոցում տարածված բույսերից է, որից Ջավախքում պատրաստում են տարատեսակ ուտեստներ: Jnews-ն այս անգամ իր ընթերցողին է ներկայացնում բազուկի ցողունով բորանու պատրաստման եղանակը:
Գայանե տատին շտապում է այգի բազուկ հավաքելու, որպեսզի դաշտից տուն վերադարձող թոռան համար բորանի պատրաստի:
Ջավախքում բազուկով բազմապիսի ուտեստներ են պատրաստում` բորանի, տոլմա, ապուր, ինչպես նաև թթու և մաճառ են դնում:
Օրջա գյուղից Գայանե Քուրդողլյանը իր հայրական տանը, այնուհետև ամուսնու տանը տեսել ու սովորել է ջավախքյան տարբերակով բազուկի ցողոններով բորանու պատրաստման եղանակը:
«Հնուց եկած ուտելիք է, մեր տատիկներն են պատրաստել, տեսել ու սովորել ենք։ Հարս գալուց հետո սկսել եմ պատրաստել իմ երեխաների և թոռների համար»,- պատմում է Գայանե տատը:
Բազուկի աճելուն ամենաշատը սպասում են Գայանե տատիկի թոռնիկները, տատիկին խնդրում են, որ բորանի պատրաստի։
Բորանին արագ պատրաստվող և ամենահամեղ ուտելիքներից է, որի պատրաստման համար առանձնահատուկ բաղադրիչներ պետք չեն:
Այսպիսով, Ձեզ ենք ներկայացնում բազուկով բորանի բաղադրիչները.
Հարկավոր է բազուկ, աղ, բուսայուղ կամ կարագ, ձու։
Պատրաստման եղանակը.
Բազուկի տերևները պետք է լավ լվանալ, այնուհետև եփել: Հենց որ գույնը փոխի պետք է այն քամել: Թավայի մեջ կարագ հալեցնել կամ բուսայուղ լցնել, արդեն քամված բազուկը կտրատել և տապակել: Փոքր ամանի մեջ ձուն կոտրել, աղ անել, հարել և լցնել բազուկի վրա: Երբ ձուն եփվի, ուտեստը պատրաստ է: Բորանին Ջավախքում մատուցում են մածուն-սխտորով:
Գայանե Ակոջյան
