Սամցխե-Ջավախքի համալսարանից հայտնել են, որ «Մաքսային գործ» ծրագիրն անպայման կբացվի Ախալքալաքում, բայց օգոստոսի 2-ից հետո, քանի որ Սամցխե-Ջավախքի համալսարանին արտոնագրի տրամադրումը ձգձգվում է:

Սամցխե-Ջավախքի համալսարանին արտոնագիր տալու վերջնական որոշումը հետաձգվել է մինչ օգոստոսի 2-ը: Ըստ այդմ, «Մաքսային գործ» նոր ծրագիրը, որը նախատեսվում էր բացել համալսարանի Ախալքալաքի մասնաշենքում, կբացվի խոստացված ժամկետից ավելի ուշ:

Սամցխե-Ջավախքի համալսարանի ռեկտոր Մակա Բերիձեն JNEWS- ի հետ հեռախոսազրույցում ասաց, որ արտոնագրի վերաբերյալ վերջնական որոշումը համալսարանին կտրվի օգոստոսի 2-ին:

«Նախապես մենք լավ տվյալներ ունենք, բայց ավելի հստակ կիմանամ օգոստոսի 2-ին: Հանդիպումը տեղի կունենա հեռավար կարգով: Ես 90 %-ով վստահ եմ, որ ամեն ինչ լավ ավարտ կունենա, և մենք մինչև օգոստոսի 10-ը կհայտարարենք գրանցումը », – ասում է Մակա Բերիձեն:

Բերիձեի խոսքերով, գրանցման համար ոչ մի փաստաթուղթ չի պահանջվում: Անհրաժեշտ է միայն, որ դիմումատուն ունենա ատեստատ, բայց գրանցման ընթացքում այն պետք չէ ներկայացնել: Ցանկացողները պարզապես պետք է մուտք գործեն համալսարանի կայք և գրանցվեն:

Ավելի վաղ JNEWS- ը գրել էր, որ Սամցխե-Ջավախքի համալսարանի Ախալքալաքի մասնաշենքում կուսուցանվի «Մաքսային գործ» ծրագիրը, որը նախատեսվում էր բացել հուլիսի 26-ին:

Ախալքալաքում կպատրաստվեն մաքսային գործի մասնագետներ