Այս տարի տեղական բյուջեի միջոցներով` Ախալքալաքի շրջանի Կիրովական և Մուրջախեթ գյուղում մարզադաշտ կկառուցվի։
Ախալքալաքի քաղաքապետարանը նորոգման աշխատանքներից խնայված 119 570 լարի գումարը հատկացրել է շրջանում տարբեր ենթակառուցվածքային աշխատանքների իրականացմանը: Այդ միջոցներից կկառուցվի երկու փոքր մարզադաշտ.
. 11 882 լարի՝ Կիրովական գյուղում փոքր մարզադաշտի կառուցման համար
. 25 353 լարի՝ Մուրջախեթ գյուղում փոքր մարզադաշտ կառուցելու համար
Մուրջախեթ գյուղի գլխավոր մասնագետ Սեդրակ Մարգարյանի խոսքերով, իրենց գյուղում վաղուց էին ուզում նման մարզադաշտ ունենալ:
«Մենք գյուղում ունենք շատ մրցանակակիրներ, մեր երիտասարդների համար զբաղմունքի, մարզվելու տեղ չկա»,- ասում է Սեդրակ Մարգարյանը։
Միաժամանակ ավելացնելով, որ մարզադաշտի կառուցման նախագիծն արդեն պատրաստ է և շուտով քաղաքապետարանն էլեկնտրոնային մրցույթ կհայտարարի:
Կիրովական գյուղում ևս մինչև հիմա մարզադաշտ չկա, որտեղ գյուղի երիտասարդները հնարավորություն կունենան ազատ և անվճար սպորտով զբաղվելու, անցկացնելու ազատ ժամանակ և պարզապես հետևելու իրենց առողջությանը: Ըստ գյուղի մասնագետ Արթուր Կուրղինյանի՝ խիստ անհրաժեշտություն կա, որպեսզի գյուղում մարզադաշտ կառուցվի:
