ՄԱԿ-ում Վրաստանի երիտասարդության ներկայացուցիչ Էսմա Գումբերիձեն Ախալքալաքում հանդիպումներ է անցկացնում երիտասարդության հետ և տեղեկություններ է տալիս եվրոպական երկրներում կրթական փոխանակման և ուսումնական տարբեր ծրագրերի մասին:
Հանդիպումներն Ախալքալաքի երիտասարդների հետ կազմակերպվել են Ախալքալաքի տեղական զարգացման խմբի (LAG) կողմից՝ GIPA- ի աջակցությամբ, «ENPARD 2» կազմակերպության գրասենյակում: Ախալքալաքից բացի, Էսմա Գումբերիձեն նախատեսում է հանդիպել նաև Դիլիսկա գյուղի երիտասարդների հետ:
Հավաքված երիտասարդները տեղեկացան այն ծրագրերի մասին, համաձայն որոնց, ցանկության դեպքում նրանք կարող են սովորել եվրոպական համալսարաններում: Դա ուսանողների համար նախատեսված «Էրազմուս +» ծրագիրն է, որն ամբողջությամբ ֆինանսավորվում է Եվրամիության կողմից, ինչպես նաև կարճաժամկետ ծրագրեր, որոնց շրջանակներում հնարավոր է մի քանի օր կամ մի քանի շաբաթ սովորել եվրոպական համալսարաններում: Էսման նաև ներկայացնում է հաջողակ երիտասարդների օրինակներ, այս անգամ երիտասարդներին ծանոթացնելով Թբիլիսիից Զառա Բաղդասարյանի փորձին, ով հասել է մասնագիտական հաջողությունների:
«Իմ նպատակներից մեկը այս տեղեկատվությունը հակիրճ փոխանցելն է. Առաջին նպատակը կայուն զարգացումն է, երկրորդը` տեղեկատվություն տարածել տարբեր ծրագրերի և միջազգային հնարավորությունների մասին, որոնցում նրանք ցանկության դեպքում կարող են մասնակցել, իսկ երրորդը` անձնական փորձի փոխանակումը», – ասաց Էսմա Գումբերիձեն:
Նա ՄԱԿ-ում Վրաստանի երիտասարդության ներկայացուցիչ է նշանակվել անցյալ 2019 թ-ի սեպտեմբերին՝ 10 ամսով, անցնելով մրցութային նախընտրական փուլերը:
Էսմա Գումբերիձեի խոսքերով, նրա պարտականությունները ներառում են երիտասարդներին ՄԱԿ-ի մասին տեղեկություն հաղորդելը:
«Այնուհետև ընտրում են մեկ նպատակ, որը կարևոր է և աշխատում դրա վրա: Ես ընտրել եմ կրթությունը: Ես անձամբ ելույթ եմ ունեցել այս Վեհաժողովի հանձնաժողովներից մեկում՝ սոցիալական զարգացման և Վրաստանում երիտասարդության վիճակի մասին: Սա հինգ րոպեանոց ելույթ էր, հասկանալի է, որ հինգ րոպեի ընթացքում հնարավոր չէ ներկայացնել բոլոր խնդիրները, բոլոր ձեռքբերումները և ընդհանուր առմամբ տիրող ամբողջ իրավիճակը: Այն, ինչ ես հասցրեցի՝ սոցիալական խնդիրներն էին, հաշմանդամությանն առնչվող խնդիրները, էթնիկ փոքրամասնությունների, կանանց, ստիպված տեղահանված անձանց խնդիրները: Փորձեցի քիչ թե շատ շոշափել այս բոլոր կատեգորիաները: Սովորաբար դիվանագետները հենց դա էլ անում են », – ասաց Էսմա Գումբերիձեն:
Նա մեկ անգամ՝ հոկտեմբեր ամսին եղել է ՄԱԿ-ում Գլխավոր Վեհաժողովին, ևս մեկ անգամ կմեկնի արդեն մարտին:
Էսմա Գումբերիձեն այցելել է Ռուսթավի, Քութաիսի, Թբիլիսիի մի շարք դպրոցներ և միշտ երիտասարդների հետ հանդիպումներին հրավիրում է այն մարդկանց, ովքեր իրենց մասնագիտության մեջ հաջողությունների են հասել:
«Ես ուզում եմ լինել կապող օղակ երիտասարդության և այս մարդկանց միջև»:
