Ախալքալաքի մունիցիպալիտետի բյուջեից 120 048 լարի է հատկացվել Կարտիկամ գյուղի ջրագծի ասբեստե խողովակները պլաստմասսե խողովակներով փոխարինելու համար:
Ախալքալաքի մունիցիպալիտետի Կարտիկամ գյուղի այն հատվածը, որը գտնվում է համեմատաբար ավելի բարձր, միշտ խմելու ջրի պակասի խնդիր է ունեցել, հատկապես ձմռան շրջանում:
Ըստ Կարտիկամի լիազոր Շալո Էլիզբարյանի, ջրագիծը ծառայում է երկար տարիներ և ասբեստե խողովակների վրա ճեղքեր են գոյացել, ջուրը դուրս է հոսում, և ըստ այդմ՝ ճնշման անկում է նկատվում, ինչի արդյունքում գյուղացիները հաճախ ջրի պակաս են ունենում:
Նրա պնդմամբ՝ նախագիծը կազմվել է դեռ 2019 թվականին, այս տարի նրանք պետք է աշխատանքներ իրականացնեն խողովակների փոփոխման ուղղությամբ:
Ըստ գյուղացիների՝ ջրագծի վրա առկա ճաքերի մեծ քանակության պատճառով ճանապարհին մեծ քանակությամբ ջուր է կորչում:
«Անցյալ տարի քաղաքապետարանի ներկայացուցիչները եկան, տեսան տեղանքը, հետո արդեն նախագիծը կազմեցին», – ասում է Շալո Էլիզբարյանը:
Ընդհանուր առմամբ, փոխվելու է 2 կմ 200 մետր խողովակաշար, որը գյուղի մի մասը ապահովում է խմելու ջրով:
Գյուղի լիազորի խոսքով՝ այս պահին գումարը հաստատված է, թե կոնկրետ, երբ կսկսեն աշխատանքները, դա հայտնի կդառնա տվյալ աշխատանքների իրականացման տենդերը հայտարարելուց հետո:
Բրատիսլավ Իգիթխանյան
