Հայաստանում անցկացվող բռնցքամարտի միջազգային առաջնությունում ախալքալաքցի բռնցքամարտիկները թիմային խաղով գրավել են առաջին հորիզոնական` նվաճելով 13 մեդալ, որոնցից 8-ը` ոսկե:

Սեպտեմբերի 27-ից 29-ը Հայաստանի Մարտունի քաղաքում անցկացվեց բռնցքամարտի միջազգային առաջնությունը ՝ նվիրված Հայաստանի անկախության 28-ամյակին:

Առաջնությանն Ախալքալաքից մասնակցում էին 13 մարզիկներ: Բոլորն էլ մրցանակային հորիզոնականներ են զբաղեցրել: Ախալքալաքցի մարզիկները վերադարձել են 8 ոսկե, 2 արծաթե և 3 բրոնզե մեդալներով:

Ոսկե մեդալակիրներ են դարձել՝ Գրիշա Էլիզբարյանը, Ժիրայր Սահարյանը, Ստեփան Զոփունյանը, Գոռ Այվազյանը, Վիգեն Փիլոսյանը, Սամվել Ղազարյանը, Արամ Խռիկյանը և Ալիկ Կուրղինյանը: Հիշեցնենք, որ Գոռ Այվազյանը 2019 թվականի Եվրոպայի չեմպիոնն է:

Երկրորդ տեղը զբաղեցրել են Արմեն Խաչատրյանը և Էդուարդ Ստեփանյանը:

Բրոնզե մեդալակիր են դարձել՝ Սերգեյ Թութունջյանը, Պավել Շահբազյանը և Հայկ Թևանյանը:

Բոլոր մարզիկներն էլ Ախալքալաքի մարզահամալիրի սաներ են: Մարզիկներին մարզում են տարբեր մարզիչներ՝ Ատոմ Էլիզբարյանը, Գագիկ Էլիզբարյանը, Վենեդիկ Ղազարյանը և Աղասի Էլիզբարյանը:

Ըստ մարզիչ Գագիկ Էլիզբարյանի, արդյունքն այնպիսին էր, ինչպիսին ակնկալում էին իրենց բռնցքամարտիկներից:

«Մենք ակնկալում էինք դրական արդյունք, և այդպես էլ եղավ», – ասում է Գագիկ Էլիզբարյանը:

Ընդհանուր առմամբ, առաջնությանը մասնակցում էր ավելի քան 200 մարզիկ՝ Վրաստանից, Հայաստանից, Ռուսաստանից և Լեռնային Ղարաբաղից: