Վրաստանի ՀՆԱ-ն 2019 թ.-ի հունվար-հուլիս ամիսներին նախորդ տարվա նույն ժամանակահատվածի համեմատ աճել է 5,1%-ով: Այս մասին վկայում են Վրաստանի Ազգային վիճակագրական ծառայության «Սաքստատ» (Գրուզստատ) նախնական տվյալները:
2019 թվականի հուլիսին Վրաստանում իրական տնտեսական աճը կազմել է 6,1%՝ 2018 թվականի հուլիսի համեմատ:
Անցած ամիս աճ է նկատվել հետևյալ ոլորտներում՝ վերամշակող արդյունաբերություն, առևտուր, շինարարություն, անշարժ գույք և այլ սպառողական ծառայություններ:
Ըստ «Սակստատ»-ի նախնական տվյալների՝ նվազում է գրանցվել արդյունահանման և քարհանքագործության ոլորտում, ինչպես նաև էլեկտրաէներգիայի, գազի և ջրի արտադրության և բաշխման ոլորտում:
2018-ին Վրաստանի ՀՆԱ-ի աճը կազմել է 4,7%, 2017-ի համեմատ:
Ավելի վաղ Fitch միջազգային վարկանիշային գործակալությունը իջեցրել էր վրացական տնտեսության 2019 թվականի աճի կանխատեսումը մինչև 4,3%՝ նախկինում սպասվող 4.6%-ից: Արժեզրկման հիմնական պատճառներից մեկը Ռուսաստանի կողմից Վրաստան ուղիղ թռիչքների արգելքն է: Fitch-ը կարծում է, որ պատժամիջոցները կխոչընդոտեն Վրաստանում զբոսաշրջության ոլորտի ընդլայնմանը: Մեկ այլ պատճառ էլ սպառողական վարկավորման դանդաղեցումն է:
Զբոսաշրջության ոլորտում եկամտի ակնկալվող կորստի պատճառով տնտեսական աճի դանդաղումը կանխատեսում է նաև Galt&Taggart խորհրդատվական ընկերությունը: Ըստ նրա կանխատեսման, 2019-ի երկրորդ կեսին աճը կկազմի 4,3%: Ընդհանուր առմամբ մեկ տարվա ընթացքում տնտեսությւոնը կաճի 4,5% -ով, գտնում են ընկերության վերլուծաբանները:
Ըստ Վրաստանի ազգային բանկի կանխատեսման, արտաքին պահանջարկի թուլացման ֆոնին, 2019 թվականին ՀՆԱ-ի իրական աճը կկազմի 4,5%:
2019 թվականի պետական բյուջեի համաձայն՝ տնտեսական աճի կանխատեսումը կազմում է 4,5%: Ինչ վերաբերում է հաջորդ տարիների կանխատեսմանը, ապա ենթադրվում է, որ արդեն 2022-ին տնտեսական աճը կկազմի 6%: