Ախալքալաքի Հանրային առողջապահության կենտրոնը (ՀԱԿ)
գեղեցկության սրահների ստուգումները դեռ չի սկսել : Սկզբում սրահները կզգուշացվեն խախտումների մասին, ու եթե սեփականատերերը չշտկեն դրանք, նրանց կտուգանեն, կամ նույնիսկ կփակեն սրահները:
Ախալքալաքի ՀԱԿ-ը, Ախալքալաքի մունիցիպալիտետի Սակրեբուլոյի որոշմամբ եւ Առողջապահության նախարարության նախաձեռնությամբ, իրավունք է ստացել վարչական իրավախախտման արձանագրություն կազմել եւ խախտումներ հայտնաբերելու դեպքում տուգանել գեղեցկության սրահները:
Ախալքալաքի ՀԱԿ-ի տնօրեն Ավետիք Տոնականյանի խոսքերով, սրահներում ստուգումները կսկսվեն այն ժամանակ, երբ նրանք հրամանը կստանան:
«Առաջին անգամ մենք ուղղակի կզգուշացնենք խախտումների մասին եւ նրանց ժամանակ կտանք դրանք վերացնելու համար, իսկ երկրորդ անգամ մենք չենք տուգանի, այլ կփակենք: Եթե մենք հիմա գնաք ստուգելու, ապա բոլորն էլ կունենան տուգանելու պատճառ: Մենք մինչ այդ մոնիտորինգ ենք արել բոլոր գեղեցկության սրահները, դրա համար էլ ինձ հայտնի է սրահների ընդհանուր իրավիճակը: Եվ մաքրության եւ գործիքների հարցում կան թերություններ», – ասում է Ավետիք Տոնականյանը:
Ախալքալաքում գրանցված է 20 գեղեցկության սրահ: ՀԱԿ-ում գյուղերում գոյություն ունեցող գեղեցկության սրահների մասին տեղեկություն չունեն: Տնօրենի խոսքերով, նա մտադիր է հայց ներկայացնել հարկային ծառայությանը եւ տեղեկություն իմանալ գյուղերի գեղեցկության սրահների մասին:
Գեղեցկության սրահներին ներկայացված պահանջները շատ են:
Նախ սրահում պետք է փակցված լինի վարակիչ հիվանդությունների կանխարգելման միջոցառումների ցանկը:
Հարկավոր է ունենալ անհրաժեշտ բոլոր գործիքները եւ պահպանել մաքրման, ախտահանման եւ ստերիլիզացման բոլոր նորմերը: Սա ներառում է բազմանգամյա գործածման գործիքների ախտահանում եւ ստերիլիզացում: Ախտահանման ժամանակ հարկավոր է նաև ունենալ անհատական պաշտպանության համար անհրաժեշտ բոլոր միջոցները:
Անհրաժեշտ է պահպանել ենթակառուցվածքի եւ սարքավորումների անվտանգությունը: Այս կետը ներառում է հետեւյալ պահանջները՝ հատակն ու պատերը պետք է լինեն հարթ եւ հասանելի մշակման համար, աշխատանքային տարածքը պետք է հագեցած լինի սառը եւ տաք ջրով, պետք է լինեն հեղուկ օճառներ եւ բավարար քանակի անձեռոցներ, մաքրման համար գործիքներ :
Թափոնների անվտանգ կառավարում: Սուր եւ վտանգավոր գործիքները պետք է պահվեն առանձին: Կոշտ թափոնները հավաքվեն առանձին արկղերում եւ այլն:
Աշխատակազմի համար հատուկ պահանջներ կան: Գոյություն ունեն նաեւ մի շարք պահանջներ էսթետիկ եւ կոսմետիկ գործողությունների վերաբերյալ:
Շուշան Շիրինյան
