Այսօր, սեպտեմբերի 14-ին Ախալքալաքում մեծ շուքով նշեցին քաղաքի օրը:
Քաղաքի կենտրոնում կազմակերպված էր միջոցառումների մի ամբողջ շարք` սկսած ավանդական շուկաներից և վերջացրած ժողովրդական համույթներից ու երաժշտությունից: Ընդհանուր մթնոլորտն, իհարկե, ուրախ էր: Մարդիկ ուրախանում էին, շնորհավորում իրենց քաղաքին իր տոնի առթիվ:
Քաղաքի կենտրոնական զբոսայգում անսովոր եռուզեռ էր: Այգու ամեն մի անկյունում մի միջոցառում էր ընթանում: Տոնական օրն սկսվեց առավտյան 12:00-ին: Առավոտից երթևեկության համար փակ էին այգի տանող ճանապարհները:
Մի կողմում ռետրո ավտոմեքենաների ցուցահանդես էր, մյուս կողմում տաղավարներ էին, որտեղ շրջանի տարբեր գյուղերի ղեկավարները գյուղական ու ավանդական ուտելիք էին հյուրասիրում մարդկանց, մեկ այլ վայրում կարատեի ցուցադրական ելույթներ էին:
Քաղաքում ուրախ խառնաշփոթ էր տիրում:
Ախալքալաքի տոնին մասնակցելու էր եկել Սամցխե-Ջավախի նահանգապետը, Նինոծմինդայի և Ախալքալաքի մունիցիպալիտետի ղեկավարությունը, հյուրեր Թբիլիսիից ու այլ վայրերից:
Աղունիկ Այվազյան
