Ախալցիխեում տեղի ունեցավ կամավորական ֆորում, որին մասնակցում էին տարբեր քաղաքների կազմակերպությունների ներկայացուցիչներ։
Ախալցիխեի Սամցխե-Ջավախեթիի պետական համալսարանը այսօր մարդաշատ էր, այդտեղ էին հավաքվել տարածաշրջանի տարբեր կազմակերպությունների, նախարարությունների ներկայացուցիչներ և ուսանողներ։
Կամավորական ֆորումը իրականացվեց “Քաղաքացիական հասարակության զարգացման” ծրագրի շրջանակներում, որի նպատակն էր ավելի ուժեղացնել կազմակերպությունների գործունեությունը ներգրավելով երիտասարդներին որպես կամավորներ։
Ֆորումին ներկա էին 15 կազմակերպություններ՝ Ախալքալաքի մեծահասակների կրթական կենտրոնը, Սամցխե-Ջավախեթի տարածաշրջանային միություն «Տոլերանտ»-ը, Ախալցիխեի երիտասարդական կենտրոնը, Սամցխե-Ջավախեթիի պետական համալսարանը, հասարակական կազմակերպություն «Աջակցություն երեխաներին», Սամցխե-Ջավախեթիի Դեմոկրատական կանանց միությունը, Ջավախքի լրատվական կենտրոնը, ասոցիացիա «Ախալքալաքի կարտոֆիլ»-ը, “Հարավային դարպաս” լրատվականը և այլն։
Ֆորումին ներկա էր նաև Կոնրադ Ադենաուերի տարածաշրջանային ծրագրի և Քութաիսի կրթության և աշխատանքի կենտրոնի ներկայացուցիչները, ովքեր կարևորեցին կամավորական ֆորումի ծրագիրը, այն համարելով ակտիվ և օգտակար գործունեություն երիտասարդների համար։
Ոչ պակաս կարևոր էր ուսանողների ոգևորվածությունը, նրանք ծանոթանում էին յուրաքանչյուր կազմակերպության հետ և ընտրում, թե որտեղ են ուզում աշխատել կամավորական սկզբունքով։
«Ինձ համար շատ կարևոր է այս միջոցառումը, քանի որ ծանոթացա շատ հասարակական կազմակերպությունների հետ։ Ուրախ եմ, որ երիտասարդները այսպես խանդավառ մասնակցում և գրանցվում են, հուսով եմ ծրագիրը հաջողությամբ կավարտվի»-, ասաց Զազաձե Լիլին։
«Շատ ուրախացա, որ մարդիկ անտարբեր չանցան, ես այսօր զգացի, մարդկանց ուշադրությունը։ Մեր կազմակերպությունը աշխատում է սահմանափակ կարողություններ ունեցող անձանց վիճակը բարելավել մեր հասարակությունում և այսօր ես հույս ունեմ, որ այդ ամենը ավելի հեշտ և արագ կիրականացվի մեր երիտասարդների շնորհիվ», – ասաց «Աջակցություն երեխաներին» հասարակական կազմակերպության տնօրեն Մայա Գաչեչիլաձեն։
“Մենք մեծահասակների կրթական կենտրոնի ներկայացուցիչներն ենք Ախալքալաքի կենտրոնի հետ միասին։ Այս կենտրոնը կրթական է, որն էլ կենտրոնացած է կարճ դասընթացների վրա, այն մարդկանց համար է, ովքեր ցանկանում են ավելի արագ և ավելի կարճ ժամանակահատվածում գիտելիք ձեռք բերել իրենց հարմար ժամանակում։ Երիտասարդների կողմից մեծ հետաքրքրություն կար մեր կազմակերպության հանդեպ”, – ասաց Ախալցիխեյի մեծահասակների կրթական կենտրոնի տնօրեն Թամունա Կապանաձեն։
Ֆորումի վերջում պարզ դարձավ, որ 15 կազմակերպությունում գրանցվել են 145 կամավոր։
Գայանե Ակոջյան
